നികുതി വെട്ടിച്ച് സര്‍വീസ് നടത്തിയ അന്തര്‍സംസ്ഥാന വാഹനങ്ങള്‍ പിടികൂടി.
പെരിന്തല്‍മണ്ണ: നികുതി വെട്ടിച്ച് സര്‍വീസ് നടത്തിയ അന്തര്‍സംസ്ഥാന വാഹനങ്ങള്‍ പിടികൂടി. മാനത്തുമംഗലം ബൈപാസിന് സമീപത്തുനിന്നാണ് ബോര്‍വെല്‍ വര്‍ക്കിന് വന്ന രണ്ടുപുതിയ അന്തര്‍സംസ്ഥാന രജിസ്‌ട്രേഷന്‍ TN 34 AD 9411,TN 34 AD 9511 വാഹനങ്ങളാണ് മോട്ടോര്‍ വാഹന വകുപ്പിന്റെ എന്‍ഫോഴ്‌സ്‌മെന്റ് വിഭാഗം പിടികൂടിയത്.
വാഹനം രജിസ്റ്റര്‍ ചെയ്ത് ഒരുമാസത്തിനുള്ളില്‍തന്നെ അതിര്‍ത്തി ചെക്ക് പോസ്റ്റില്‍ റിപോര്‍ട്ട് ചെയ്യാതെ ഊടുവഴികളിലൂടെ സംസ്ഥാനത്തെത്തിയ വാഹനങ്ങളാണ് പിടികൂടിയത്. പിന്നീട് ത്രൈമാസ നികുതി ഈടാക്കിയതിനുശേഷം വാഹന ഉടമസ്ഥര്‍ക്ക് വിട്ടുനല്‍കി.
മലപ്പുറം മോട്ടോര്‍ വാഹന വകുപ്പ് എന്‍ഫോഴ്‌സ്‌മെന്റ് വിഭാഗം മോട്ടോര്‍ വെഹിക്കിള്‍ ഇന്‍സ്‌പെക്ടര്‍ ശരത് സേനന്‍, അസിസ്റ്റന്റ് മോട്ടോര്‍ വെഹിക്കിള്‍സ് ഇന്‍സ്‌പെക്ടര്‍മാരായ അജീഷ്, മനോഹരന്‍ എന്നിവരാണ് സംഘത്തിലുണ്ടായിരുന്നത്. വാഹനപരിശോധന വരുംദിവസങ്ങളില്‍ രാത്രിയിലും തുടരുമെന്ന് പെരിന്തല്‍മണ്ണ ജോയിന്റ് ആര്‍ടിഒ സി യു മുജീബ് അറിയിച്ചു.