കൊവിഡ് ബാധിതയായ യുവതിക്ക് ആംബുലന്സില് സുഖപ്രസവം.
കോഴിക്കോട്: കൊവിഡ് ബാധിതയായ യുവതിക്ക് ആംബുലന്സില് സുഖപ്രസവം. ആശുപത്രിയിലേക്കുള്ള യാത്ര മധ്യേയാണ് യുവതി കനിവ് 108 ആംബുലന്സില് ആണ്കുഞ്ഞിന് ജന്മം നല്കിയത്.
ഈ മാസം 15നായിരുന്നു യുവതിയുടെ പ്രസവ തിയതി. തിരൂരങ്ങാടി താലൂക്ക് ആശുപത്രിയില് അഡ്മിറ്റ് ആകാന് എത്തിയ യുവതിക്ക് ഇതിന് മുന്നോടിയായി നടത്തിയ കൊവിഡ് പരിശോധനയിലാണ് വൈറസ് ബാധ കണ്ടെത്തിയത്. മികച്ച ചികിത്സയ്ക്കായി ഇവരെ മഞ്ചേരി മെഡിക്കല് കോളജിലേക്ക് റഫര് ചെയ്യുകയായിരുന്നു.
കണ്ട്രോള് റൂമില് നിന്നുള്ള വിവരത്തിന്റെ അടിസ്ഥാനത്തില് ആംബുലന്സ് സ്ഥലത്തെത്തി. ആംബുലന്സില് പുറപ്പെട്ട് കുറച്ച് കഴിഞ്ഞപ്പോള് യുവതിയ്ക്ക് പ്രസവ വേദനയുടെ ലക്ഷണങ്ങള് കണ്ടുതുടങ്ങി. ആംബുലന്സിലെ എമര്ജന്സി മെഡിക്കല് ടെക്നീഷ്യന്റെ പരിചരണത്തില് ഉച്ചയ്ക്ക് ഒരു മണിയോടെ യുവതി കുഞ്ഞിന് ജന്മം നല്കുകയായിരുന്നു.
അമ്മയും കുഞ്ഞും മലപ്പുറം മഞ്ചേരി മെഡിക്കല് കോളജില് ചികിത്സയിലാണ്. ഇരുവരും സുഖമായി ഇരിക്കുന്നതായി ആശുപത്രി അധികൃതര് അറിയിച്ചു. ഇത് രണ്ടാം തവണയാണ് കനിവ് 108 ആംബുലന്സില് കൊവിഡ് ബാധിതയായ യുവതി പ്രസവിക്കുന്നത്.
