ഗ്യാസ് സിലിൻഡർ പൊട്ടിത്തെറിച്ച് ചായക്കട കത്തിനശിച്ചു
കൂട്ടായി സുൽത്താൻ ബീച്ചിൽ ഗ്യാസ് സിലിൻഡർ പൊട്ടിത്തെറിച്ച് കത്തിനശിച്ച ഹസൈനാരുടെ ചായക്കടയിൽ അഗ്നിരക്ഷാസേന തീയണയ്ക്കുന്നു
പുറത്തൂർ : കൂട്ടായി സുൽത്താൻ ബീച്ചിൽ ചായക്കടയിൽ തീപ്പിടിത്തം. ഗ്യാസ് സിലിൻഡർ പൊട്ടിത്തെറിച്ചുണ്ടായ അപകടത്തിൽ ഓലമേഞ്ഞ കട പൂർണമായും കത്തിനശിച്ചു. ഹസ്സനാരുപുരയ്ക്കൽ കുന്നത്ത് ഹസൈനാരുടെ കടയിലാണ് ഞായറാഴ്‌ച ഉച്ചയ്ക്കുശേഷമാണ് തീപ്പിടിത്തമുണ്ടായത്.
ഗ്യാസിൽനിന്ന് തീപടരുന്നതുകണ്ട് കടയിലുണ്ടായിരുന്ന രണ്ടുപേർ പുറത്തേക്കോടിയതിനാൽ ആളപായമുണ്ടായില്ല. കടയ്ക്കകത്തുണ്ടായിരുന്ന രണ്ടു ഗ്യാസ് സിലിൻഡറും കത്തിയിരുന്നു. ഓടിക്കൂടിയ നാട്ടുകാരും മത്സ്യത്തൊഴിലാളികളും തീയണയ്ക്കാൻ ശ്രമിച്ചെങ്കിലും നടന്നില്ല. തിരൂരിൽനിന്ന് രണ്ടു യൂണിറ്റ്‌ അഗ്നിരക്ഷാസേന എത്തിയാണ് തീയണച്ചത്.
