മൂഡ് ഓഫ് ജോയ് ചിത്രപ്രദര്‍ശനം നാളെ ആരംഭിക്കും
മലപ്പുറം;സുദര്‍ശന്‍ തിരൂരിന്റെ അഞ്ച് ദിവസത്തെ ചിത്ര പ്രദര്‍ശനം മലപ്പുറം കോട്ടക്കുന്ന് ലളിതകലാ അക്കാദമി ആര്‍ട്ട് ഗ്യാലറിയില്‍ നാളെ (ജനുവരി 19 ന് ) ആരംഭിക്കും.
മൂഡ് ഓഫ് ജോയ് എന്ന് പേരിട്ടിരിക്കുന്ന പ്രദര്‍ശനത്തില്‍ ജീവിതത്തിന്റെ വ്യത്യസ്ത ഭാവങ്ങളാണ് വരച്ച് കാണിക്കുന്നതെന്ന് സുദര്‍ശന്‍ തിരൂര്‍ മലപ്പുറത്ത് വാര്‍ത്താ സമ്മേളനത്തില്‍ അറിയിച്ചു.
പ്രകൃതി ദൃശ്യങ്ങളും കാല്‍പ്പനിക ഭാവങ്ങളും യാഥാര്‍ത്ഥ ബോധത്തിന്റെ ആനന്ദവും ഇതില്‍ ഉള്‍ക്കൊള്ളുന്നു. പ്രസ്ഥാനങ്ങളുടെ പ്രലോഭനങ്ങളില്‍പെട്ട് മൂല്യബോധം നഷ്ടപ്പെട്ട സമൂഹത്തിന്റെ വിലാപങ്ങളും ഇതില്‍ ചിത്രീകരിച്ചിട്ടുണ്ട്. 30ലധികം ചിത്രങ്ങളാണ് പ്രദര്‍ശനത്തിനുള്ളത്. തിരൂര്‍ നോര്‍ത്ത് അന്നാരയില്‍ കടവത്ത് പറമ്പില്‍ ബാലകൃഷ്ണന്റെയും ശാന്തയുടെയും മകനാണ് സുദര്‍ശന്‍.
19 ന് രാവിലെ 11 മണിക്ക് മലപ്പുറം മുനിസിപ്പല്‍ ചെയര്‍മാന്‍ മുജീബ് കാടേരി പ്രദര്‍ശനം ഉദ്ഘാടനം ചെയ്യും. കെ പി രാജു, ടി സി ഷംസുദ്ദീന്‍,കെ അബ്ദള്‍ റഷീദ് എന്നിവരും വാര്‍ത്താ സമ്മേളനത്തില്‍ പങ്കെടുത്തു.