സംഭാവന പെട്ടി മോഷ്ടാവ് താനൂർ പൊലീസ് പിടിയിൽ

താനൂർ: വ്യാപാര സ്ഥാപനങ്ങളിൽ വെക്കുന്ന സംഭാവന പെട്ടി മോഷ്ടിക്കുന്ന മോഷ്ടാവ് താനൂർ പൊലീസ് പിടിയിൽ. തൃശൂർ പെരിങ്ങോട്ടുകര സ്വദേശി സന്തോഷ് കുമാറാണ്(48) അറസ്റ്റിലായത്. തിങ്കളാഴ്ച വൈകീട്ട് വെള്ളിയാമ്പുറത്തെ ലിബാസ് ടെക്സ്റ്റയിൽസിൽ നിന്നും സംഭാവന പെട്ടി മോഷ്ടിച്ച് ഓടുന്നതിനിടയിലാണ് പ്രതി പിടിയിലാകുന്നത്.

തൃശൂർ അന്തിക്കാട്, വലപ്പാട്, മതിലകം, വടക്കാഞ്ചേരി മലപ്പുറം, കൊണ്ടോട്ടി, കോഴിക്കോട് കസബ എന്നിവിടങ്ങളിൽ സമാന കേസുകളിൽ പ്രതിയാണ് ഇയാൾ. പാലിയേറ്റീവ്, ചാരിറ്റി പ്രവർത്തനങ്ങൾക്കായി കടകളിൽ സ്ഥാപിക്കുന്ന സംഭാവനപ്പെട്ടിയാണ് ഇയാൾ കവരാറുള്ളത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.