വിമാനത്താവളത്തിൽ നിന്നും ഒരു കോടിയുടെ സ്വർണം പിടിച്ചെടുത്തു; രണ്ടു പേർ അറസ്റ്റിൽ

നെടുമ്പാശേരി: നെടുമ്പാശ്ശേരി വിമാനത്താവളത്തിൽ നിന്നും ഒരു കോടിയുടെ സ്വർണം പിടിച്ചെടുത്തു. ഗൾഫിൽനിന്ന് കടത്തിക്കൊണ്ടുവന്ന 1.982 കിലോ സ്വർണമാണ് കസ്റ്റംസ് എയർ ഇന്റലിജൻസ് വിഭാഗം പിടികൂടിയത്. ഞായറാഴ്ച എയർ അറേബ്യ വിമാനത്തിൽ ഷാർജയിൽ നിന്നുമെത്തിയ മലപ്പുറം സ്വദേശികളായ സിദ്ധാർഥ് മധുസൂദനൻ, നിതിൻ ഉണ്ണികൃഷ്ണൻ എന്നിവരാണ് സ്വർണവുമായി പിടിയിലായത്.

സിദ്ധാർഥ് 1131 ഗ്രാം സ്വർണമിശ്രിതവും നിതിൻ 851 ഗ്രാം സ്വർണമിശ്രിതവുമാണ് കൊണ്ടുവന്നത്. സ്വർണമിശ്രിതം കാപ്സ്യൂൾ രൂപത്തിലാക്കി ഗർഭനിരോധന ഉറകളിൽ പൊതിഞ്ഞ് മലദ്വാരത്തിൽ ഒളിപ്പിച്ചിരിക്കുകയായിരുന്നു. പിടികൂടിയ സ്വർണത്തിന് ഒരുകോടിയോളം രൂപ വിലവരും.