പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ 16 കാരനടക്കം മൂന്നുപേർ പിടിയിൽ

തിരുവനന്തപുരം: നെടുമങ്ങാട് പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ 16 കാരനടക്കം മൂന്നുപേർ പിടിയിൽ. എട്ടാം ക്ലാസ് വിദ്യാർത്ഥിനിയായ 12 വയസുകാരിയെ ലൈംഗികമായി പീഡിപ്പിച്ച കേസിൽ 16 കാരൻ, ഇയാളുടെ അമ്മയുടെ സുഹൃത്തായ ചുള്ളിമാനൂരിലെ പുല്ലമ്പാറ സന്തോഷ്(36), പെൺകുട്ടിയുടെ ബന്ധുവായ 50 കാരൻ എന്നിവരാണ് പിടിയിലായത്. 16 കാരന് പെൺകുട്ടിയെ പീഡിപ്പിക്കാൻ ഒത്താശ ചെയ്തതിനാണ് സന്തോഷിനെ പിടികൂടിയത്. പെൺകുട്ടി നാലാം ക്ലാസിൽ പഠിക്കുമ്പോൾ ലൈംഗികമായി പീഡിപ്പിച്ചതിനാണ് ബന്ധു അറസ്റ്റിലായത്.

കഴിഞ്ഞ ദിവസം രാവിലെ സ്‌കൂളിലേക്ക് പോയ വിദ്യാർത്ഥിനിയെയാണ് സുഹൃത്തായ 16 കാരനും സന്തോഷും ചേർന്ന് തട്ടിക്കൊണ്ടുപോയി ചുള്ളിയൂരിലെത്തിച്ച് പീഡിപ്പിച്ചത്. സന്തോഷിന്റെ ആളൊഴിഞ്ഞ വീട്ടിൽ വെച്ചാണ് പെൺകുട്ടിയെ പീഡിപ്പിച്ചത്. സ്‌കൂളിൽ വിടാമെന്ന് പറഞ്ഞാണ് പെൺകുട്ടിയെ വാനിൽ കയറ്റിയത്. പെൺകുട്ടിയെ തട്ടിക്കൊണ്ട് പോയതിന് ശേഷം 16 കാരനെയും പെൺകുട്ടിയേയും മുറിയിൽ പൂട്ടിയിട്ട ശേഷം സന്തോഷ് മടങ്ങുകയായിരുന്നു. പീഡനത്തിനും ശേഷം മടങ്ങിയെത്തിയ സന്തോഷ് ഇരുവരെയും വാനിൽ കയറ്റുകയും അടുത്തുള്ള ജംഗ്ഷനിൽ പെൺകുട്ടിയെ ഉപേക്ഷിച്ച് കടന്നുകളയുകയുമായിരുന്നു.

കുട്ടി ക്ലാസിലെത്തിയില്ലെന്ന് സ്‌കൂൾ അധികൃതർ അറിയിച്ചപ്പോഴാണ് വീട്ടുകാർ സംഭവമറിയുന്നത്. ഇതോടെ വീട്ടുകാർ പോലീസിൽ പരാതി നൽകുകയും പെൺകുട്ടിയെ കണ്ടെത്തുകയുമായിരുന്നു.പിന്നീട് വിശദമായി മൊഴിയെടുത്തപ്പോഴാണ് മുമ്പുണ്ടായ പീഡന വിവരവും പെൺകുട്ടി വെളിപ്പെടുത്തിയത്.

നാലാം ക്ലാസിൽ പഠിക്കുമ്പോൾ അടുത്ത ബന്ധുവായ 50 വയസുകാരനിൽ നിന്ന് രണ്ടു തവണ പീഡനമുണ്ടായെന്ന് പെൺകുട്ടി പറഞ്ഞു. ഇതിന്റെ അടിസ്ഥാനത്തിൽ ഇയാളെയും അറസ്റ്റ് ചെയ്യുകയായിരുന്നു. അറസ്റ്റിലായ 16കാരനെ ജുവനൈൽ ഹോമിലാക്കി. മറ്റ് രണ്ട് പേരെ കോടതിയിൽ ഹാജരാക്കി റിമാൻറ് ചെയ്തു.