വർക്ക് ഷോപ്പിൽ കയറി പാർട്സ് മോഷ്ടിക്കാൻ ശ്രമം; നാലു യുവാക്കളെ അരീക്കോട് പോലീസ് അറസ്റ്റു ചെയ്തു.

മലപ്പുറം: മുണ്ടംപറമ്പിലെ വർക്ക് ഷോപ്പിൽ പാർക്ക് ചെയ്ത വാഹനത്തിൽ നിന്ന് പാർട്സ് മോഷ്ടിക്കാൻ ശ്രമിച്ച നാലു യുവാക്കളെ അരീക്കോട് പോലീസ് അറസ്റ്റു ചെയ്തു. മൊറയൂർ സ്വദേശികളായ മുഹമ്മദ് അജ്മൽ (22), മുഹമ്മദ് നുഹയിൽ (24), അരിമ്പ്ര സ്വദേശികളായ അജ്മൽ (25), മുർഷിദ് (25) എന്നിവരെയാണ് അരീക്കോട് എസ്എച്ച്ഒ സി വി ലൈജുമോൻ അറസ്റ്റു ചെയ്തത്.

കഴിഞ്ഞ ഞായറാഴ്ച രാത്രിയിലാണ് സംഭവം. മുണ്ടംപറമ്പിലെ വർക്ക് ഷോപ്പിൽ എത്തിയ നാലംഗ സംഘം ഇവിടെ നിർത്തിയിട്ടിരുന്ന ഇന്നോവ കാറിൽ നിന്ന് പാർട്സുകൾ ഊരി മാറ്റി കടത്താൻ ശ്രമിക്കുകയായിരുന്നു. വാഹനത്തിൽ നിന്ന് പാർട്സ് ഊരി മാറ്റുന്നത് കണ്ട പ്രദേശവാസികൾ ഇവരെ പിടികൂടി. തുടർന്ന് അരീക്കോട് പോലീസിനു കൈമാറുകയായിരുന്നു.

യുവാക്കളിൽ ഒരാളുടെ ഇന്നോവ കാറിൻ്റെ പാർട്സുകൾ തകരാറിലായതിനെ തുടർന്നാണ് വർക്ക് ഷോപ്പിലെ ഇന്നോവ കാറിൻ്റെ പാർട്സ് മോഷ്ടിക്കാൻ ശ്രമം നടത്തിയതെന്ന് അരീക്കോട് പോലീസ് പറഞ്ഞു. ഞായറാഴ്ച അവധി ദിവസമായതിനാൽ രാത്രിയിൽ വർക്ക് ഷോപ്പിൽ പണിക്കാർ ഉണ്ടായിരുന്നില്ല. ഈ സമയമാണ് പ്രതികൾ മോഷണത്തിന് തിരഞ്ഞെടുത്തത്. പ്രതികൾക്കെതിരെ മോഷണക്കുറ്റത്തിന് കേസെടുത്ത് മഞ്ചേരി കോടതിയിൽ ഹാജരാക്കി റിമാൻഡ് ചെയ്തു. അരീക്കോട് എസ്എച്ച്ഒ സി വി ലൈജുമോൻ്റെ നേതൃത്വത്തിൽ എസ്ഐമാരായ അമ്മദ്, സുബ്രഹ്മണ്യൻ, കബീർ, രതീഷ്, രാഹുലൻ, ജിനേഷ് എന്നിവരടങ്ങുന്ന പോലീസ് സംഘമാണ് പ്രതികളെ പിടികൂടിയത്.