18 വയസ് കഴിഞ്ഞ എല്ലാവർക്കും ബൂസ്റ്റർ ഡോസ് സൗജന്യമായി നൽകാൻ കേന്ദ്ര സർക്കാർ തീരുമാനം.

ന്യൂഡൽഹി: സർക്കാർ ആശുപത്രികൾ വഴി കൊവിഡ് വാക്സിൻ്റെ ബൂസ്റ്റർ ഡോസുകൾ സൗജന്യമായി നൽകാൻ കേന്ദ്ര മന്ത്രിസഭാ യോഗത്തിൻ്റെ തീരുമാനം. 18 നും 59 നും ഇടയിൽ പ്രായമുള്ള എല്ലാവർക്കും സൗജന്യമായി ബൂസ്റ്റർ ഡോസ് ലഭിക്കും. സ്വാതന്ത്ര്യത്തിൻ്റെ 75 -ാം വാർഷികത്തിൻ്റെ ഭാഗമായുള്ള ആസാദി കാ അമൃത് മഹോത്സവത്തോട് അനുബന്ധിച്ചാണ് സൗജന്യ ബൂസ്റ്റർ ഡോസ് ഡ്രൈവ് സംഘടിപ്പിക്കാൻ കേന്ദ്ര സർക്കാർ തീരുമാനിച്ചത്. ഈ മാസം 15 മുതൽ 75 ദിവസമാണ് ബൂസ്റ്റർ ഡോസ് സൗജന്യമായി വിതരണം ചെയ്യുക.

രാജ്യത്തെ 18 നും 59 നും ഇടയിലുള്ള ഒരു ശതമാനം ആളുകൾ മാത്രമാണ് ഇതുവരെ ബൂസ്റ്റർ ഡോസ് എടുത്തിട്ടുള്ളത്. കൊവിഡ് മുൻനിര പോരാളികൾ, 60 വയസിനു മുകളിൽ പ്രായമുള്ളവർ ഉൾപ്പെടുന്ന 16 കോടി ജനസംഖ്യയിലെ ഏകദേശം 26 ശതമാനം പേർ ബൂസ്റ്റർ ഡോസ് സ്വീകരിച്ചിട്ടുണ്ട്. കൊവിഡ് രണ്ടാം വാക്സിൻ സ്വീകരിച്ച് ഒൻപത് മാസം പൂർത്തിയായ ശേഷമായിരുന്നു ബൂസ്റ്റർ ഡോസ് ലഭിക്കുക. വിദഗ്ധരുടെ നി‍ർദേശ പ്രകാരം, ഈ കാലപരിധി കേന്ദ്ര സർക്കാർ ആറു മാസത്തേക്ക് കുറച്ചിട്ടുണ്ട്. ഈ വ‍ർഷം ഏപ്രിൽ മുതലാണ് 18 ന് മുകളിൽ പ്രായമുള്ളവ‍ക്ക് ബൂസ്റ്റ‍ർ ഡോസ് വിതരണം ചെയ്തു തുടങ്ങിയത്.

അതേസമയം ഇന്ത്യൻ ജനസംഖ്യയുടെ 96 ശതമാനം ആളുകളും കൊവിഡ് പ്രതിരോധ വാക്സിൻ്റെ ആദ്യ ഡോസും 87 ശതമാനം ആളുകൾ രണ്ടു ഡോസുകളും സ്വീകരിച്ചിട്ടുണ്ട്. കഴിഞ്ഞവർഷം ജനുവരി 16 മുതലാണ് രാജ്യത്ത് വാക്സിൻ വിതരണം ആരംഭിച്ചത്. ഫെബ്രുവരി രണ്ടു മുതൽ മുൻനിര പോരാളികൾക്കും മാർച്ച് ഒന്നു മുതൽ 60 വയസിനു മുകളിൽ പ്രായമുള്ളവർക്കും വാക്സിൻ വിതരണത്തിന് തുടക്കം കുറിച്ചു. ഏപ്രിൽ ഒന്നു മുതലാണ് 45 വയസിനു മുകളിൽ പ്രായമുള്ളവർക്കുള്ള വാക്സിൻ ഡ്രൈവ് ആരംഭിച്ചത്. മേയ് ഒന്നിന് 18 വയസിനു മുകളിൽ പ്രായമുള്ളവർക്കു വാക്സിൻ വിതരണം ചെയ്തു തുടങ്ങി. ഈ വർഷം ആദ്യം 15 നും 18 നും ഇടയിലുള്ളവർക്കും മാർച്ച് 16 മുതൽ 12 നും 14 നും ഇടയിലുള്ളവർക്കുമുള്ള കുത്തിവെപ്പും ആരംഭിച്ചിരുന്നു.