കെ ടി ജലീലിന്റെ ഓഫീസിൽ കരിഓയിൽ ഒഴിച്ച് യുവമോർച്ച

എടപ്പാൾ: കെ ടി ജലീൽ എംഎൽഎയുടെ എടപ്പാളിലെ ഓഫീസിൽ യുവമോർച്ച പ്രവർത്തകർ കരിഓയിൽ ഒഴിച്ചു. ഓഫീസിലെ ബോർഡിലും ഷട്ടറിലുമാണ് കരിഓയിൽ ഒഴിച്ചത്. യുവമോർച്ച ജില്ലാ പ്രസിഡന്റ് സജീഷ് ഏലായിലിൻ്റെ നേതൃത്വത്തിലാണ് പ്രതിഷേധം നടത്തിയത്. ഓഫീസിന്റെ ഷട്ടറിൽ കാശ്മീർ ഇന്ത്യയുടേത് എന്ന് എഴുതി ഒട്ടിക്കുകയും ചെയ്തു.

സ്വാതന്ത്ര്യദിനമായതിനാൽ ഓഫീസിന് അവധിയായിരുന്നു. പ്രതിഷേധസമയം കെ ടി ജലീൽ എംഎൽഎ മലപ്പുറത്ത് നടന്ന ഫ്രീഡം സ്ക്വയർ പരിപാടിയിൽ പങ്കെടുക്കുകയായിരുന്നു. ജമ്മു കശ്മീരുമായി ബന്ധപ്പെട്ട് കെ ടി ജലീൽ എംഎൽഎ നടത്തിയ വിവാദ പരാമർശത്തിലാണ് യുവമോർച്ച പ്രവർത്തകർ പ്രതിഷേധിച്ചത്. ജമ്മു കശ്മീർ സന്ദർശനത്തിനിടെ കെ ടി ജലീൽ ഫേസ്ബുക്കിൽ പങ്കുവെച്ച കുറിപ്പിലെ ചില പരാമർശങ്ങളാണ് വിവാദത്തിന് തിരികൊളുത്തിയത്. കഴിഞ്ഞ ദിവസം മലപ്പുറത്തെ ബിജെപി പ്രവർത്തകർ ജലീലിൻ്റെ കോലം കത്തിച്ചിരുന്നു. ഇതിനു പിന്നാലെയാണ് കരിഓയിൽ പ്രതിഷേധവും അരങ്ങേറിയത്.