സുരേഷ് ഗോപി പൊലീസ് വേഷത്തില്‍ എത്തുന്ന ചിത്രം. ഇങ്ങനെ കേട്ടാല്‍ മലയാളികള്‍ക്ക് പ്രതീക്ഷ ഏറെയാണ്. പൊലീസ് യൂണിഫോമിലെ അദ്ദേഹത്തിന്റെ ലുക്കും മുൻകാലങ്ങളില്‍ ഇറങ്ങിയ ചിത്രങ്ങളും തന്നെയാണ് അതിന് കാരണം.
നിലവില്‍ ഗരുഡൻ എന്ന ചിത്രത്തിലും പൊലീസ് വേഷത്തില്‍ ആണ് സുരേഷ് ഗോപി എത്തുന്നത്. ഈ ചിത്രത്തിന്റെ പുതിയ അപ്ഡേറ്റ് പങ്കുവച്ചിരിക്കുകയാണ് അണിയറ പ്രവര്‍ത്തകര്‍.
ഗരുഡന്റെ പോസ്റ്റര്‍ ആണ് പുറത്തുവിട്ടിരിക്കുന്നത്. ഗരുഡന്റെ ചിറകില്‍ ബിജു മേനോന്റെ മുഖവും ഉടല്‍ ഭാഗമായി സുരേഷ് ഗോപിയെയും ആണ് പോസ്റ്ററില്‍ ഉള്‍പ്പെടുത്തിയിരിക്കുന്നത്. ‘ഗരുഡന്റെ ചിറകുകള്‍ അനീതിക്ക് മേല്‍ കൊടുംങ്കാറ്റാവും’, എന്നാണ് പോസ്റ്റര്‍ പങ്കിട്ട് സുരേഷ് ഗോപി കുറിച്ചത്. പിന്നാലെ നിരവധി പേര്‍ അഭിനന്ദനങ്ങളും കമന്റുകളുമായി രംഗത്തെത്തി. എല്ലാം വിജയത്തില്‍ എത്തട്ടെ എന്നാണ് ആരാധകര്‍ പറയുന്നത്.
നീണ്ടകാലത്തിന് ശേഷം സുരേഷ് ഗോപിയും ബിജു മേനോനും ഒന്നിക്കുന്ന ചിത്രം കൂടിയാണ് ഗരുഡൻ. അരുണ്‍ വര്‍മ്മ സംവിധാനം ചെയ്യുന്ന ചിത്രത്തിന് തിരക്കഥ ഒരുക്കുന്നത് മിഥുൻ മാനുവല്‍ തോമസ് ആണ്. അഞ്ചാം പാതിര എന്ന സൂപ്പര്‍ ഹിറ്റ് ചിത്രത്തിന് ശേഷം മിഥുൻ തിരക്കഥ ഒരുക്കുന്നത് കൊണ്ടുതന്നെ ഗരുഡന്റെ പ്രേക്ഷ പ്രതീക്ഷ വലുതാണ്.
ലീഗല്‍ ത്രില്ലര്‍ മൂഡിലുള്ള ചിത്രത്തില്‍ കേരള ആംഡ് പൊലീസിന്റെ കമാന്റന്റ് ആയ ഹരീഷ് മാധവൻ എന്ന കഥാപാത്രത്തെ ആണ് സുരേഷ് ഗോപി അവതരിപ്പിക്കുന്നത്. നിഷാന്ത് എന്ന കോളേജ് പ്രൊഫസറുടെ വേഷം ബിജുമേനോൻ കൈകാര്യം ചെയ്യുന്നു. ലിസ്റ്റിൻ സ്റ്റീഫന്റെ നേതൃത്വത്തില്‍ മാജിക് ഫ്രെയിംസ് ആണ് ഗരുഡന്റെ നിര്‍മാണം. ചിത്രം നവംബറില്‍ തിയറ്ററുകളില്‍ എത്തും.