തിരുവനന്തപുരം: തലസ്ഥാനത്ത് വീണ്ടും മയക്കുമരുന്ന് വേട്ട. ന്യൂജനറേഷൻ മയക്കുമരുന്നായ എംഡിഎംഎയും കഞ്ചാവുമായി രണ്ട് യുവാക്കളെ എക്സൈസ് അറസ്റ്റ് ചെയ്തു.കുടപ്പനക്കുന്ന് സ്വദേശിയായ ഓജി എന്ന് വിളിക്കുന്ന യുവരാജ്, മൂന്നാംമൂട് സ്വദേശിയായ അർജുൻ എന്നിവരാണ് മയക്കുമരുന്നുമായി പിടിയിലായത്. ഇവരില്‍ നിന്നും 10.55 ഗ്രാം എംഡിഎംഎയും 14 ഗ്രാം കഞ്ചാവും കണ്ടെടുത്തു.
രഹസ്യ വിവരത്തിന്‍റെ അടിസ്ഥാനത്തില്‍ നടത്തിയ പരിശോധനയിലാണ് യുവാക്കള്‍ മയക്കുമരുന്നുമായി എക്സൈസ് സംഘത്തിന്‍റെ പിടിയിലായത്. തിരുവനന്തപുരം എക്സൈസ് എൻഫോഴ്‌സ്‌മെന്‍റ് & ആന്റി നർക്കോട്ടിക് സ്പെഷ്യല്‍ സ്ക്വാഡ് സർക്കിള്‍ ഇൻസ്പെക്ടർ എ.പി.ഷാജഹാന്റെ നേതൃത്വത്തിലാണ് പ്രതികശെ പൊക്കിയത്. പ്രിവന്റീവ് ഓഫീസർമാരായ സന്തോഷ്‌ കുമാർ, സുരേഷ് ബാബു, സിവില്‍ എക്സൈസ് ഓഫീസർമാരായ കൃഷ്ണപ്രസാദ്, ശരത്, നിഖില്‍ രാജ് (സൈബർ സെല്‍), അനന്തു എന്നിവരും റെയ്ഡില്‍ പങ്കെടുത്തു.
അതിനിടെ ആലപ്പുഴയിലും എംഡിഎംഎയും കഞ്ചാവുമായി യുവാവിനെ എക്സൈസ് അറസ്റ്റ് ചെയ്തു. മണ്ണഞ്ചേരി സ്വദേശിയായ നസീർ നവാസ് (21) ആണ് പിടിയിലായത്. ഇയാളില്‍ നിന്നും 2.1932 ഗ്രാം എംഡിഎംഎയും 1.87ഗ്രാം കഞ്ചാവും കണ്ടെത്തി. ആലപ്പുഴ എക്സൈസ് സർക്കിള്‍ ഇൻസ്പെക്ടർ ആർ. പ്രശാന്തിന്‍റെ നിർദ്ദേശാനുസരണം എക്സൈസ് ഇൻസ്പെക്ടർ ഫെമിൻ.ജി, അസിസ്റ്റന്റ് എക്സൈസ് ഇൻസ്പെക്ടർ വിജയകുമാർ.പി, സിവില്‍ എക്സൈസ് ഓഫീസർമാരായ വർഗീസ് പയസ്, ഗോപീകൃഷ്ണൻ, സിവില്‍ എക്സൈസ് ഓഫീസർ ഡ്രൈവർ വർഗീസ്.എ.ജെ എന്നിവരടങ്ങിയ സംഘമാണ് നവാസിനെ അറസ്റ്റ് ചെയ്തത്.
