ഭൂനികുതി വര്‍ധനവിനെതിരെ കോണ്‍ഗ്രസ് വില്ലേജ് ഓഫീസ് ധര്‍ണ്ണ നടത്തി
പൊന്നാനി: സംസ്ഥാന സര്‍ക്കാര്‍ പുതുക്കി നിശ്ചയിച്ച ഭൂനികുതി മുന്‍ വര്‍ഷത്തേതില്‍ നിന്നും 50 ശതമാനം വര്‍ദ്ധിപ്പിച്ച തീരുമാനത്തില്‍ പ്രതിഷേധിച്ചുകൊണ്ട് ഈഴുവത്തിരുത്തി മണ്ഡലം കോണ്‍ഗ്രസ് കമ്മിറ്റിയുടെ നേതൃത്വത്തില്‍ ഈ ഴുവത്തിരുത്തി വില്ലേജ് ഓഫീസിനു മുന്നില്‍ ധര്‍ണ്ണ നടത്തി. 1983ല്‍ ഒരു ഹെക്ടറിന് രണ്ട് രൂപ ഉണ്ടായിരുന്ന ഭൂ നികുതിയാണ് 2025 -26ല്‍ ഒരു ഹെക്ടറിന് 1200 രൂപയായി വര്‍ധിപ്പിച്ചത്. ജനങ്ങള്‍ക്കും, കാര്‍ഷിക മേഖലയ്ക്കും വന്‍ ബാധ്യത ഉണ്ടാക്കുന്ന സര്‍ക്കാര്‍ തീരുമാനം പിന്‍വലിക്കണമെന്ന് ധര്‍ണ്ണ ഉദ്ഘാടനം ചെയ്തുകൊണ്ട് കെപിസിസി മെമ്പര്‍ എ എം രോഹിത് ആവശ്യപ്പെട്ടു. മണ്ഡലം പ്രസിഡണ്ട് എന്‍ പി നബീല്‍ അധ്യക്ഷത വഹിച്ചു. ഡിസിസി ജനറല്‍ സെക്രട്ടറി എന്‍ എ ജോസഫ്, ജെ പി വേലായുധന്‍, എ പവിത്രകുമാര്‍, എന്‍ പി സുരേന്ദ്രന്‍, സി ഗഫൂര്‍, സി ജാഫര്‍, ഉസ്മാന്‍ തെയ്യങ്ങാട്, യു രവീന്ദ്രന്‍, എം അമ്മുക്കുട്ടി, പ്രഭാകരന്‍ കടവനാട്, മൂത്തേടത്ത് ബാലകൃഷ്ണന്‍,ഫസലുറഹ്‌മാന്‍ എന്നിവര്‍ പ്രസംഗിച്ചു.
