തിരുവനന്തപുരം സി.എച്ച് സെന്റര്‍ അനക്‌സ് ആപ്പ് ലോഞ്ചിംഗ് ഫെബ്രുവരി 25 ന്
തിരുവനന്തപുരം മെഡിക്കല്‍ കോളേജ് കേന്ദ്രീകരിച്ച് പ്രവര്‍ത്തിച്ച് വരുന്ന തിരുവനന്തപുരം സി.എച്ച് സെന്ററിന്റെ പ്രവര്‍ത്തനങ്ങള്‍ വിപുലീകരിക്കുന്നതിന് ആവശ്യമായ ഫണ്ട് സമാഹരണത്തിന്റെ ഭാഗമായി ‘തിരുവനന്തപുരം സി.എച്ച് സെന്റര്‍ ഇനി കൂടുതല്‍ വിശാലതയിലേക്ക് ‘ എന്ന ശീര്‍ഷകത്തില്‍ സംഘടിപ്പിക്കുന്ന ക്യാമ്പയിനിന്റെ ഭാഗമായുള്ള ആപ്പിന്റെ ലോഞ്ചിങ്ങ് 2025 ഫെബ്രുവരി 25 ന് രാവിലെ 10.30 ന് പാണക്കാട് മര്‍വ്വ ഓഡിറ്റോറിയത്തില്‍ വെച്ച് നടക്കുന്ന ചടങ്ങില്‍ പാണക്കാട് സയ്യിദ് സാദിഖലി ശിഹാബ് തങ്ങള്‍ നിര്‍വ്വഹിക്കും. സി.എച്ച് സെന്റര്‍ പ്രസിഡണ്ട് ഇ.ടി മുഹമ്മദ് ബഷീര്‍ എം.പി അധ്യക്ഷത വഹിക്കും. ചടങ്ങില്‍ മുസ്ലിം ലീഗ് ദേശീയ ജനറല്‍ സെക്രട്ടറി പാണക്കാട് സയ്യിദ് അബ്ബാസലി ശിഹാബ് തങ്ങള്‍, പി.കെ കുഞ്ഞാലിക്കുട്ടി എം.എല്‍.എ, പി.വി അബ്ദുല്‍ വഹാബ് എം.പി, പി.എം.എ സലാം, സയ്യിദ് മുനവ്വറലി ശിഹാബ് തങ്ങള്‍, എം.പി അബ്ദുസമദ് സമദാനി എംപി, കെ.പിഎ മജീദ് എം.എല്‍.എ , ഡോ എം.കെ മുനീര്‍ എം.എല്‍എ , പ്രൊഫ. കെ. കെ ആബിദ് ഹുസൈന്‍ തങ്ങള്‍ എം.എല്‍എ, പി. അബ്ദുല്‍ ഹമീദ് മാസ്റ്റര്‍ എം.എല്‍.എ , ടി.വി ഇബ്രാഹിം എം.എല്‍.എ , കുറിക്കോളി മൊയ്തീന്‍ എം.എല്‍.എ തുടങ്ങി മുസ്ലിം ലീഗ്, സംസ്ഥാന, ജില്ല, മണ്ഡലം, പഞ്ചായത്ത് ഭാരവാഹികളും ജനപ്രതിനിധികളും പങ്കെടുക്കും.
2004 മുതല്‍ തിരുവനന്തപുരം മെഡിക്കല്‍ കോളേജിന് സമീപം ചാലക്കുഴി റോഡില്‍ പ്രവര്‍ത്തിച്ചു വരുന്ന സി.എച്ച് സെന്റര്‍ തലസ്ഥാന നഗരിയിലെത്തുന്ന നൂറ് കണക്കിന് രോഗികള്‍ക്ക് ആശാ കേന്ദ്രമായി പ്രവര്‍ത്തിക്കുന്നു. കേരളത്തിന്റെ വിവിധ ഭാഗങ്ങളില്‍ നിന്ന് ആര്‍.സി.സി യിലും ശ്രീചിത്ര ഹോസ്പിറ്റലിലും ചികിത്സക്കായി എത്തുന്ന രോഗികള്‍ക്കും കൂട്ടിരിപ്പുകാര്‍ക്കും സൗജന്യ താമസവും ഭക്ഷണവും , വാഹന സൗകര്യം, നിര്‍ദ്ധനരായ രോഗികള്‍ക്ക് സാമ്പത്തിക സഹായം, അടിയന്തിരഘട്ടങ്ങളില്‍ രക്തദാനം തുടങ്ങി നിരവധി സഹായങ്ങളാണ് നല്‍കി വരുന്നത്. ഒരേ സമയം മുന്നൂറിലധികം ആളുകള്‍ക്കാണ് നിലവില്‍ താമസ സൗകര്യമുള്ളത്. രോഗികളുടെ എണ്ണം വര്‍ദ്ധിച്ചതിനാലും ആതുര സേവന മേഖലകളില്‍ പുതിയ പ്രവര്‍ത്തനങ്ങള്‍ നടപ്പിലാക്കാനും ഉദേശിച്ച് എട്ട് കോടി രൂപ ചെലവ് പ്രതീക്ഷിക്കുന്ന അനക്‌സ് കെട്ടിട്ട നിര്‍മ്മാണത്തിന് തുടക്കം കുറിച്ചിട്ടുണ്ട്. അതിന്റെ പൂര്‍ത്തീകരണത്തിനായാണ് പരിശുദ്ധ റമസാന്‍ മാസത്തില്‍ 2025 മാര്‍ച്ച് 1 മുതല്‍ 31 വരെയുള്ള തിയ്യതികളില്‍ ക്രൗഡ് ഫണ്ടിംഗ് നടത്തുന്നത്.