കായംകുളം: കുപ്രസിദ്ധ ഗുണ്ട ഫൈസല്‍ (31) സംഘടിപ്പിച്ച പിറന്നാളാഘോഷം പൊളിച്ച്‌ കായംകുളം പൊലീസ്. കഴിഞ്ഞ ബുധനാഴ്ച രാത്രി 10.30 ഓടെയാണ് പുതുപ്പള്ളി കൂട്ടം വാതുക്കല്‍ പാലത്തില്‍ വെച്ച്‌ ഗുണ്ടകള്‍ ചേര്‍ന്ന് പിറന്നാളാഘോഷം സംഘടിപ്പിച്ചത്.ഫൈസലിനെ കൂടാതെ കായംകുളത്ത് യുവാവിനെ കാർ കയറ്റി കൊലപ്പെടുത്തിയ കേസിലെ പ്രതിയും ഗുണ്ടയുമായ കായംകുളം മത്സ്യമാർക്കറ്റിന് സമീപം താമസിക്കുന്ന അജ്മല്‍ (27), കാപ്പാ നിയമപ്രകാരം നടപടി നേരിട്ടു കൊണ്ടിരിക്കുന്ന ഗുണ്ട പത്തിയൂർ സ്വദേശി ആഷിക്ക് (24), ആഷിക്കിന്‍റെ സഹോദരൻ ആദില്‍ (22), കൃഷ്ണപുരം സ്വദേശി മുനീർ (25), മുനീറിന്‍റെ സഹോദരൻ മുജീബ് (23), ഗോപൻ (37), ഉണ്ണിരാജ് (30), ആദില്‍ (23), പ്രവീണ്‍ (29), അനന്തകൃഷ്ണൻ (30) എന്നിവരാണ് പൊലീസ് പിടിയിലായത്.
സംഘം ചേർന്ന് ഗതാഗതം തടസ്സപ്പെടുത്തി പരസ്യമായി മദ്യപിച്ചാണ് ഇവര്‍ പിറന്നാള്‍ ആഘോഷിച്ചത്. സ്ഥലത്തെത്തിയ പൊലീസ് ഇവരെ പിടികൂടുകയായിരുന്നു. ഇവരില്‍ സഹോദരൻമാരായ ആദിലും ആഷിക്കും കൊലപാതക ശ്രമം, പോക്സോ, നാഷണല്‍ ഹൈവേയില്‍ സ്ത്രീയോട് അപമര്യാദയായി പെരുമാറിയതുള്‍പ്പെടെയുള്ള കേസുകളില്‍ പ്രതിയാണ്. മുനീറും, പ്രവീണും മയക്കുമരുന്ന് കേസുകളില്‍ പ്രതിയുമാണ്.