സംസ്ഥാനത്തെ വിവിധ ജില്ലകളില്‍ വേനല്‍ മഴ കനക്കുന്നു, മലപ്പുറത്തും കോഴിക്കോടും മഴയും കാറ്റും ശക്തം
മലപ്പുറം: സംസ്ഥാനത്തെ വിവിധ ജില്ലകളില്‍ വേനല്‍ മഴ കനക്കുന്നു. വടക്കൻ കേരളത്തിലാണ് പ്രധാനമായും മഴ ശക്തമായിട്ടുള്ളതെങ്കിലും തലസ്ഥാന ജില്ലയിലടക്കം നേരിയ മഴ ലഭിക്കുന്നുണ്ട്.മലപ്പുറത്തും കോഴിക്കോടും മലയോര മേഖലയിലടക്കം കനത്ത മഴയും കാറ്റുമാണ് അനുഭവപ്പെടുന്നത്. മലപ്പുറത്ത് നിലമ്ബൂർ, കരുളായി, വാണിയമ്ബലം, വണ്ടൂർ എന്നിവിടങ്ങളിലാണ് മഴ ശക്തമായത്.
മേഖലയിലെ പലയിടങ്ങളിലും മരങ്ങള്‍ കടപുഴകി വീണു. ചില സ്ഥലങ്ങളില്‍ റോഡ് ഗതാഗതം തടസപ്പെട്ടു. മരങ്ങള്‍ വീണ് വാഹനങ്ങള്‍ക്കും കേടുപാടുകള്‍ പറ്റിയിട്ടുണ്ട്. മഴയില്‍ നിലമ്ബൂർ വല്ലപുഴയില്‍ റോഡിനു കുറുകേ മരം കടപുഴകി വീണു. നിലമ്ബൂർ -കരുളായി റോഡില്‍ ഗതാഗതം മുടങ്ങി. നിലമ്ബൂരില്‍ മഴയില്‍ ഗവണ്‍മെന്‍റ് യു പി സ്കൂളിന്‍റെ മതില്‍ തകർന്നുവീണു. നിർമ്മാണത്തിലിരുന്ന മതിലാണ് തകർന്നത്. ആളപകടമില്ലാത്തത് ഭാഗ്യമായി.
കോഴിക്കോട് കൂടരഞ്ഞി മേഖലയിലാണ് കനത്ത മഴയും കാറ്റും അനുഭവപ്പെടുന്നത്. കൂടരഞ്ഞി കരിങ്കുറ്റിയില്‍ തെങ്ങ്‌ കടപുഴകി വൈദ്യുതി പോസ്റ്റ് തകർന്നു. വൈദ്യുതി പോസ്റ്റ് വീണത്ത് അറിയാതെ എത്തിയ ഓട്ടോറിക്ഷ വെദ്യുതി പോസ്റ്റില്‍ ഇടിച്ചു കയറിയത്. ആർക്കും പരിക്കില്ലെന്നാണ് വിവരം.