കാസര്‍കോട്: കാസർകോട് രണ്ട് എക്സൈസ് ഉദ്യോഗസ്ഥരെ പ്രതി കമ്ബി കൊണ്ട് കുത്തി പരിക്കേല്‍പ്പിച്ചു. എക്സൈസ് നർക്കോട്ടിക് സ്ക്വാഡിലെ പ്രജിത്, രാജേഷ് എന്നിവർക്കാണ് കുത്തേറ്റത്.108 കിലോ കഞ്ചാവ് പിടിച്ച കേസില്‍ പ്രതി ബംബ്രാണ സ്വദേശി അബ്‍ദുള്‍ ബാസിത്തിനെ പിടികൂടാൻ എത്തിയപ്പോഴായിരുന്നു ആക്രമണം. പ്രജിത്തിന് കഴുത്തിനും രാജേഷിന് കൈക്കുമാണ് ബാസിത്ത് കുത്തി പരിക്കേല്‍പ്പിച്ചത്.
ഇവർ കാസർകോട് ജനറല്‍ ആശുപത്രിയില്‍ ചികിത്സ തേടി. വാറന്‍റ് പ്രതിയായ അബ്‍ദുള്‍ ബാസിത്ത് സ്ഥലത്തുണ്ടെന്ന് മനസിലാക്കി എക്സൈസ് എത്തിയപ്പോള്‍ ബാസിത് രക്ഷപ്പെടാനുള്ള ശ്രമത്തിനിടെ അടുത്ത് കണ്ട ഇരുമ്ബ് കമ്ബി എടുത്ത് കുത്തുകയായിരുന്നു. ബാസിത്തിനെ അറസ്റ്റ് ചെയ്ത് കോടതിയില്‍ ഹാജരാക്കി റിമാൻഡ് ചെയ്തു.