പാലക്കാട്: പാലക്കാട് റെില്‍വേ സ്റ്റേഷനില്‍ ട്രെയിനില്‍ നിന്നും ഒരു വയസ്സുകാരിയെ തട്ടി കൊണ്ടുപോയ സംഭവത്തില്‍ ഒരാളെ പൊലീസ് അറസ്റ്റ് ചെയ്തു.ദിണ്ടിഗല്‍ സ്വദേശി വെട്രിവേല്‍ ആണ് പിടിയിലായത്. ഒഡീഷ സ്വദേശികളായ ദമ്ബതികളുടെ ഒരു വയസുള്ള കുഞ്ഞിനെയാണ് കഴിഞ്ഞ ദിവസം ഇയാള്‍ ട്രെയിനില്‍ നിന്നും തട്ടിക്കൊണ്ട് പോയത്. നാട്ടുകാരും ഓട്ടോതൊഴിലാളികളും ചേർന്നാണ് കുഞ്ഞിനെ രക്ഷപ്പെട്ടത്തിയത്.
ഇന്നലെ രാത്രി പന്ത്രണ്ടരയോടെയാണ് സംഭവം. ഒഡീഷയില്‍ നിന്ന് ആലുവയിലേക്കുള്ള ടാറ്റ നഗർ എക്സ്പ്രസിലാണ് ദമ്ബതികള്‍ കുഞ്ഞുമായി വന്നിരുന്നത്. തൃശൂർ എത്തിയപ്പോഴാണ് കുട്ടിയെ കാണാതായത് മാതാപിതാക്കള്‍ അറിഞ്ഞത്. ഉടൻ തന്നെ ഇവർ റെയില്‍വേ പൊലീസിനെ വിവരം അറിയിച്ചു. കുഞ്ഞിൻറെ ഫോട്ടോയും അയച്ചു കൊടുത്തു. പാലക്കാട് റെയില്‍വേ സ്റ്റേഷനില്‍ പരിശോധന നടക്കുമ്ബോഴാണ് സംശയകരമായ സാഹതര്യത്തില്‍ കുഞ്ഞുമായി ഒരാളെ നാട്ടുകാർ കാണുന്നത്.
കുട്ടി നിർത്താതെ കരയാൻ തുടങ്ങിയതോടെ ഓട്ടോറിക്ഷ തൊഴിലാളികള്‍ ഇയാളെ തടഞ്ഞു നിർത്തി ചോദ്യം ചെയ്തു. ഇതോടെ കുഞ്ഞിനെ ഉപേക്ഷിച്ച്‌ പ്രതി അവിടെ നിന്ന് കടന്നു കളയാൻ ശ്രമിച്ചു. ഇതോടെ പ്രതിയെ നാട്ടുകാർ ചേർന്ന് പിടികൂടി പൊലീസിനെ ഏല്‍പ്പിച്ചു. ചോദ്യം ചെയ്യലിലാണ് ദിണ്ടിഗല്‍ സ്വദേശി വെട്രിവേല്‍ ട്രെയിനില്‍ വെച്ച്‌ കുട്ടിയെ തട്ടിയെടുത്തതായി സമ്മതിച്ചത്. വെട്രിവേലും ദമ്ബതിമാർ സഞ്ചരിച്ചിരുന്ന ട്രെയിനില്‍ യാത്ര ചെയതിരുന്നു. ഉറങ്ങികിടന്ന കുഞ്ഞിനെ അച്ഛനമ്മമാരുടെ കണ്ണ് വെട്ടിച്ച്‌ കൈക്കലാക്കിയ ശേഷം ഇയാള്‍ പാലക്കാട് സ്റ്റേഷനില്‍ ഇറങ്ങുകയായിരുന്നുവെന്ന് പൊലീസ് പറഞ്ഞു.