റവന്യു വകുപ്പില് 376 ഒഴിവുകള്; പി.എസ്.സിക്ക് റിപ്പോര്ട്ട് ചെയ്യാന് നിര്ദ്ദേശം നല്കി മന്ത്രി
തിരുവനന്തപുരം: റവന്യൂ വകുപ്പിലെ 376 ഒഴിവുകള് പി എസ് സിക്ക് റിപ്പോര്ട്ട് ചെയ്യാന് നിര്ദ്ദേശം നല്കിയതായി മന്ത്രി കെ രാജന്. ലാന്ഡ് റവന്യൂ വകുപ്പിലെ 376 ജീവനക്കാരെ സീനിയര് ക്ലാര്ക്ക്/സ്പെഷ്യല് വില്ലേജ് ഓഫീസര് തസ്തികളിലേക്ക് സ്ഥാനക്കയറ്റം നല്കിയതോടെ വന്ന അത്രയും ക്ലര്ക്ക് തസ്തികയിലേക്കുള്ള ഒഴിവുകള് അടിയന്തരമായി പി എസ് സിക്ക് റിപ്പോര്ട്ട് ചെയ്യാന് നിര്ദ്ദേശം നല്കി.
ക്ലര്ക്ക്, വില്ലേജ് അസിസ്റ്റന്റുമാരുടെ അന്തിമ സീനിയോരിറ്റി ലിസ്റ്റില് ഉള്പ്പെട്ടവരെയാണ് കെഎസ് ആന്ഡ് എസ്എസ്ആര് ചട്ടപ്രകാരം യോഗ്യതയുടെ അടിസ്ഥാനത്തില് സ്ഥാനക്കയറ്റം നല്കിയത്. ഇതോടെ വരുന്ന 376 ഒഴിവുകളും റിപ്പോര്ട്ട് ചെയ്യാന് ലാന്ഡ് റവന്യൂ കമ്മിഷണര്ക്കാണ് നിര്ദ്ദേശം നല്കിയത്.
ഡെപ്യൂട്ടി കളക്ടര് മുതല്, സീനിയര് ക്ലര്ക്ക് വരെയുള്ള റവന്യൂ ജീവനക്കാരുടെ സ്ഥാനക്കയറ്റം സമയബന്ധിതമായി പൂര്ത്തീകരിക്കാന് ഒരു പ്രവര്ത്തന കലണ്ടര് തയ്യാറാക്കി നടപടികള് മുന്നോട്ടുകൊണ്ടു പോകണം എന്ന റവന്യൂ മന്ത്രിയുടെ അധ്യക്ഷതയില് ചേര്ന്ന യോഗം തീരുമാനിച്ചിരുന്നു. ഇതിന്റെ അടിസ്ഥാനത്തിലാണ് നടപടികള് വേഗത്തിലാക്കി 376 പേര്ക്ക് സ്ഥാനക്കയറ്റം നല്കാന് കഴിഞ്ഞതെന്നും കെ രാജന് അറിയിച്ചു.