ചെറുതുരുത്തി (തൃശ്ലൂർ) : പൈങ്കുളത്ത് ഓട്ടോറിക്ഷ ഓട്ടം വിളിച്ച പോക്സോ കേസ് പ്രതിയായ ആള്‍ ഡ്രൈവറെ പിന്നില്‍ നിന്നും ആക്രമിച്ചു പരിക്കേല്‍പ്പിച്ചു.പൈങ്കുളം മനക്കല്‍ തൊടി വീട്ടില്‍ ഉണ്ണികൃഷ്ണനാണ് പരിക്കേറ്റത്. പൈങ്കുളം അയ്യപ്പ എഴുത്തച്ഛൻ പടി സെന്റർ നിന്നും രാവിലെ 7.50 ടെ ഓട്ടോറിക്ഷ ഓട്ടം വിളിച്ച്‌ പാഞ്ഞാള്‍ ഭാഗത്തേക്ക് പോകുന്നതിനു ഇടയിലായിരുന്നു സംഭവം.
പിന്നില്‍ നിന്നും മൂർച്ചയേറിയ ആയുധം ഉപയോഗിച്ച്‌ പ്രതി പെട്ടെന്ന് കഴുത്തിനു മുറിപ്പിക്കാനുള്ള ശ്രമം നടത്തുകയായിരുന്നു. ഓട്ടോ വേഗം നിർത്തി ഉണ്ണികൃഷ്ണൻ ഉടൻ തന്നെ ഓടി ഒരു വീട്ടില്‍ സഹായം തേടുകയായിരുന്നു. തുടർന്ന് നാട്ടുകാരാണ് മുറിവേറ്റ ഇയാളെ തൊട്ടടുത്തുള്ള ആശുപത്രിയില്‍ എത്തിച്ചത്. തുടർന്ന് പ്രാഥമിക ശുശ്രൂഷ നല്‍കി വിദഗ്ധ ചികിത്സയ്ക്കായി മുളങ്കുന്നത്തുകാവ് മെഡിക്കല്‍ കോളേജിലേക്ക് കൊണ്ടുപോയി.
വിവരമറിഞ്ഞ് ചെറുതുരുത്തി പോലീസ് സ്ഥലത്തെത്തി അന്വേഷണം ആരംഭിച്ചു. ചെറുതുരുത്തി എസ് ഐ -എ. ആർ. നിഖിലിന്റെ നേതൃത്വത്തില്‍ പോലീസ് സംഘം പ്രതിയായ ബാലകൃഷ്ണനെ വീടിനു സമീപം ഒളിച്ചിരിക്കുന്ന നിലയില്‍ കണ്ടെത്തി പിടികൂടുകയായിരുന്നു. മുമ്ബ് ഒരു പോക്സോ കേസില്‍ ഉള്‍പ്പെട്ടു ഇയാള്‍ക്കെതിരെ കേസെടുത്തിട്ടുണ്ട്. എന്തിനാണ് ആക്രമിച്ചത് സംബന്ധിച്ച്‌ കൂടുതല്‍ വിവരങ്ങള്‍ അറിയുന്നതിന് പോലീസ് ഇയാളെ ചോദ്യം ചെയ്തുവരികയാണ്’