മോഷണത്തിനിടെ പിടിയിലായി, രക്ഷപ്പെടാന്‍ കെട്ടിടത്തില്‍ നിന്നും ചാടി കാലും ഒടിഞ്ഞു; കുപ്രസിദ്ധ മോഷ്ടാവ് തൊരപ്പന്‍ സന്തോഷ് പിടിയില്‍
കുപ്രസിദ്ധ മോഷ്ടാവ് തൊരപ്പന്‍ സന്തോഷ് കാസര്‍കോട് മേല്‍പ്പറമ്പില്‍ പിടിയിയില്‍. സൂപ്പര്‍ മാര്‍ക്കറ്റില്‍ കവര്‍ച്ച നടത്തുന്നതിനിടെ തൊരപ്പനെ നാട്ടുകാര്‍ സാഹസികമായി പിടികൂടുകയായിരുന്നു. രക്ഷപെടാന്‍ കെട്ടിടത്തിന്റെ ഒന്നാം നിലയില്‍ നിന്ന് താഴേക്ക് ചാടിയ സന്തോഷിന്റെ കാല് ഒടിഞ്ഞു.
വെള്ളിയാഴ്ച പുലര്‍ച്ചെ മേല്‍പ്പറമ്പിലെ ഹൈപ്പര്‍ മാര്‍ക്കറ്റില്‍ കവര്‍ച്ച നടത്തുന്നതിനിടയിലാണ് തൊരപ്പന്‍ സന്തോഷിനെ പിടികൂടിയത്. ഹൈപ്പര്‍ മാര്‍ക്കറ്റിന്റെ സമീപത്ത് പാര്‍ക്ക് ചെയ്തിരുന്ന ബൈക്കുകള്‍ എടുക്കാന്‍ വന്ന യുവാക്കളാണ് അകത്ത് മോഷ്ടാവുണ്ടെന്ന് മനസിലാക്കുന്നത്. അകത്ത് നിന്ന് ശബ്ദം കേട്ടത് സംശയത്തിന് ഇട വരുത്തിയത്.
ഉടന്‍ തന്നെ നാട്ടുകാരെ വിവരം അറിയിച്ചു. ആളുകള്‍ ഓടിക്കൂടി കെട്ടിടം വളഞ്ഞു. ഇത് കണ്ട തൊരപ്പന്‍ സന്തോഷ് ഒന്നാം നിലയില്‍ നിന്ന് എടുത്ത് ചാടി. വീഴ്ചയില്‍ കാല് ഒടിഞ്ഞതിനാല്‍ എഴുന്നേറ്റ് ഓടാന്‍ സാധിച്ചില്ല. നിരവധി കവര്‍ച്ചാ കേസുകളില്‍ പ്രതിയായ സന്തോഷ് കണ്ണൂര്‍ ജില്ലയിലെ കുടിയാന്മല സ്വദേശിയാണ്. ഭിത്തി തുരന്ന് അകത്തു കടന്നു കവര്‍ച്ച നടത്തുന്നതിനാലാണ് തൊരപ്പന്‍ എന്ന പേര് വീണത്.