കണ്ണൂർ: തലശേരിയില്‍ നിർമാണത്തിലിരിക്കുന്ന കെട്ടിടത്തില്‍ സ്ത്രീയുടെ അസ്ഥികൂടം കണ്ടെത്തിയതില്‍ തമിഴ്‌നാട് സേലം സ്വദേശിനി ധനകോടി(63)യുടെ ഭർത്താവ് അമ്ബായിര(70)ത്തെ പൊലീസ് ചോദ്യം ചെയ്തു.ഇന്നലെയാണ് ജൂബിലി റോഡ് കാന്തലാട്ട് പള്ളിക്ക് സമീപത്തെ നിർമാണത്തിലിരിക്കുന്ന കെട്ടിടത്തില്‍ ധനകോടിയുടെതെന്ന് കരുതുന്ന അസ്ഥികൂടം കണ്ടെത്തിയത്. കെട്ടിടത്തില്‍ ലിഫ്റ്റ് സ്ഥാപിക്കാനായി എടുത്ത കുഴിയിലാണ് അസ്ഥികൂടം കണ്ടെത്തിയത്. പിന്നാലെ അമ്ബായിരം പൊലീസ് പിടിയിലായിരുന്നു.
ഭർത്താവിനൊപ്പം പഴയ സാധനങ്ങള്‍ ശേഖരിച്ചുവരികയായിരുന്ന ധനകോടിയെ ആറ് മാസമായി കാണാനില്ലായിരുന്നു. അമ്മയെ കാണാനില്ലാത്തതിനെ കുറിച്ച്‌ മക്കള്‍ ചോദിച്ചപ്പോള്‍ നാട്ടില്‍ പോയെന്നായിരുന്നു അമ്ബായിരത്തിന്റെ മറുപടി. എന്നാല്‍ മക്കള്‍ നാട്ടില്‍ അന്വേഷിച്ചെങ്കിലും അവിടെ എത്തിയില്ലെന്ന വിവരം ലഭിച്ചു. മക്കള്‍ വീണ്ടും അമ്ബായിരത്തോട് ധനകോടിയെ കുറിച്ച്‌ ചോദിച്ചു. ഇതോടെ അമ്ബായിരം മക്കളോടും ബന്ധുക്കളോടും തലശേരിയിലേക്ക് വരാൻ ആവശ്യപ്പെട്ടു. ഇവർ എത്തിയപ്പോള്‍ അമ്ബായിരം അസ്ഥികൂടമുണ്ടായിരുന്ന സ്ഥലം കാണിച്ചുകൊടുക്കുകയായിരുന്നു.
പൊലീസ് പരിശോധനയ്ക്കിടെയാണ് കുഴിയില്‍ അസ്ഥിയും തലയോട്ടിയും കണ്ടെത്തിയത്. പിന്നാലെ ഫോറൻസിക് ഉദ്യോഗസ്ഥരും സ്ഥലത്തെത്തി. വിശദ പരിശോധനയ്ക്ക് ശേഷമേ ഇത് ധനകോടിയുടെ അസ്ഥികൂടമാണോ എന്നത് വ്യക്തമാകൂ.
പൊലീസ് നടത്തിയ പ്രാഥമിക പരിശോധനയില്‍ ഇത് കൊലപാതകമാണെന്നാണ് കരുതുന്നത്. അസ്ഥിയില്‍ പൊട്ടലടക്കം കണ്ടെത്തിയിട്ടുണ്ട്.അമ്മയെ കാണാനില്ലെന്ന് കാണിച്ച്‌ അമ്ബായിരത്തിനെതിരെ മകൻ പരാതി നല്‍കിയിട്ടുണ്ട്. സാരിയുടെ അവശിഷ്ടവും ചെരുപ്പും സംഭവ സ്ഥലത്തുനിന്ന് കണ്ടെത്തിയിട്ടുണ്ട്. മദ്യപാനത്തിനിടെ ഉണ്ടായ തർക്കമാണ് കൊലപാതകത്തിലേക്ക് നയിച്ചതെന്ന് അമ്ബായിരം മൊഴി നല്‍കിയതായും റിപ്പോർട്ടുകളുണ്ട്.
