നടക്കാവ്: കോഴിക്കോട് നടക്കാവില് ബീഫ് ഫ്രൈയെ ചൊല്ലി യുവാക്കള് തമ്മില് സംഘർഷം. ഹോട്ടലിലെത്തിയ മദ്യപസംഘം മറ്റൊരു സംഘത്തോട് ബീഫ് ഫ്രൈ വാങ്ങി നല്കാൻ ആവശ്യപ്പെട്ടതാണ് തർക്കത്തിലേക്കെത്തിയത്.
നടക്കാവിലെ ഹോട്ടലിലെത്തിയ ആദ്യ സംഘം പിന്നാലെ എത്തിയ സംഘത്തോട് ബീഫ് ഫ്രൈ വാങ്ങി നല്കാൻ ആവശ്യപ്പെട്ടു. എന്നാല് വാങ്ങി നല്കില്ലെന്ന് രണ്ടാമത്തെ സംഘം വ്യക്തമാക്കിയതോടെ ഇരുകൂട്ടരും തമ്മില് വാക്കുതർക്കമായി. തർക്കം ശ്രദ്ധയില്പെട്ട ഹോട്ടല് ജീവനക്കാർ ഇവരോട് ഹോട്ടലില്നിന്നും ഇറങ്ങാൻ ആവശ്യപ്പെട്ടു. ഇതോടെ റോഡിലിറങ്ങി ഇരു സംഘവും കയ്യേറ്റത്തില്വരെയെത്തി.
സംഭവമറിഞ്ഞ് പൊലീസ് എത്തിയിട്ടും ഇരു സംഘവും തർക്കം തുടരുകയായിരുന്നു. ഇതിനിടെ ബോധരഹിതനായി വീണ യുവാവിനെ പൊലീസ് ആംബുലൻസില് ആശുപത്രിയിലേക്ക് മാറ്റി. സംഘർഷത്തില് അരമണിക്കൂറോളമാണ് നടക്കാവില് ഗതാഗതം സ്തംഭിച്ചത്. സംഭവത്തില് കേസ് എടുത്തിട്ടില്ലെന്നാണ് പുറത്തുവരുന്ന വിവരം.