പ്രഗ്യാന് റോവര് സാങ്കേതികവിദ്യയുമായി ലിറ്റില് കൈറ്റ്സ് ജില്ലാ ക്യാംപ്: 223 സ്കൂളുകള്ക്ക് കൈറ്റിന്റെ അഡ്വാന്സ്ഡ് റോബോട്ടിക് കിറ്റുകള്
ഇന്ത്യയുടെ അഭിമാനമായ ചന്ദ്രയാന് 3 ദൗത്യത്തിലെ ‘പ്രഗ്യാന്’ റോവറിനെ ഭൂമിയിലിരുന്ന് നിയന്ത്രിച്ച് ചന്ദ്രനില് നിന്നുള്ള വിവരങ്ങള് ശേഖരിച്ചതിന് സമാനമായ സാങ്കേതിക വിദ്യകള് സ്കൂള് കുട്ടികള്ക്കും വശമാക്കാന് അവസരമൊരുക്കി ലിറ്റില് കൈറ്റ്സ് ജില്ലാ സഹവാസ ക്യാംപ്.
കോട്ടക്കല് രാജാസ് ഹയര്സെക്കണ്ടറി സ്കൂളില് നടക്കുന്ന ക്യാംപില് ജില്ലയിലെ 223 സ്കൂളുകള്ക്കുള്ള അഡ്വാന്സ്ഡ് റോബോട്ടിക് കിറ്റുകളുടെ വിതരണം കൈറ്റ് സി.ഇ.ഒ. കെ. അന്വര് സാദത്ത് ഓണ്ലൈന് ആയി നിര്വ്വഹിച്ചു. കേരളത്തിലെ കുട്ടികളെ വെറും ഡിജിറ്റല് ഉപഭോക്താക്കളായല്ല മറിച്ച് സാങ്കേതികവിദ്യ രൂപകല്പന ചെയ്യുന്ന ഡിജിറ്റല് ആര്ക്കിടെക്റ്റുകളായാണ് സര്ക്കാര് വളര്ത്തുന്നതെന്ന് കെ. അന്വര് സാദത്ത് ആമുഖ പ്രഭാഷണത്തില് പറഞ്ഞു.
പത്താം ക്ലാസിലെ ഐ.ടി പാഠ്യപദ്ധതിയില് നിലവില് റോബോട്ടിക്സ് ഒരു വിഷയമായി ഉള്പ്പെടുത്തിയിട്ടുണ്ട്. ലിറ്റില് കൈറ്റ്സ് യൂണിറ്റുകളിലൂടെ ഇപ്പോള് നല്കുന്ന അഡ്വാന്സ്ഡ് റോബോട്ടിക്സ്, ഐ.ഒ.ടി പരിശീലനങ്ങള് വിജയകരമായി പൂര്ത്തിയാക്കി സ്ഥിരത കൈവരിക്കുന്ന മുറയ്ക്ക്, വരും വര്ഷങ്ങളില് ഇത് സംസ്ഥാനത്തെ മുഴുവന് വിദ്യാര്ത്ഥികള്ക്കും ലഭ്യമാകുന്ന രീതിയില് പൊതു പാഠ്യപദ്ധതിയുടെ ഭാഗമാക്കാന് ലക്ഷ്യമിടുന്നതായും അദ്ദേഹം കൂട്ടിചേര്ത്തു. സബ് ജില്ലാ ക ക്യാംപുകളില് നിന്ന് തിരഞ്ഞെടുക്കപ്പെട്ട 104 കുട്ടികള്ക്കാണ് രണ്ട് ദിവസത്തെ ക്യാംപിൽ പ്രോഗ്രാമിങ്ങിന് പുറമെ ത്രിമാന അനിമേഷന് മേഖലയിലും വിദഗ്ധ പരിശീലനം നല്കുന്നത്.
ഐ.എസ്.ആര്.ഒ.യും നാസയും തങ്ങളുടെ ബഹിരാകാശ ദൗത്യങ്ങളില് റോവറുകളെ നിയന്ത്രിക്കാന് ഉപയോഗിക്കുന്ന അതേ സാങ്കേതിക തത്വങ്ങളാണ് ക്യാംപിലെ പ്രോഗ്രാമിങ് സെഷനുകളുടെ അടിസ്ഥാനം. കുറഞ്ഞ ബാന്ഡ്വിഡ്ത്തിലും ഐ.ഒ.ടി ഉപകരണങ്ങള് തമ്മില് മികച്ച രീതിയില് ആശയവിനിമയം നടത്താന് സഹായിക്കുന്ന പ്രോട്ടോക്കോള് ഉപയോഗിച്ചാണ് കുട്ടികള് ഉപകരണങ്ങള് തയ്യാറാക്കുന്നത്. ഗ്രഹങ്ങള്, ഖനികള്, കുഴല്ക്കിണറുകള്, മാന്ഹോളുകള് തുടങ്ങി മനുഷ്യര്ക്ക് നേരിട്ട് എത്താന് പ്രയാസമുള്ള ഇടങ്ങളില് പരീക്ഷണങ്ങള്ക്കും രക്ഷാപ്രവര്ത്തനങ്ങള്ക്കും ഉപയോഗിക്കാവുന്ന വിദൂര നിയന്ത്രിത റോവര് ഉപകരണങ്ങളുടെ സാങ്കേതിക വിദ്യയാണ് കുട്ടികള് ക്യാമ്പിലൂടെ പരിചയപ്പെടുന്നത്.
സ്കൂളുകളിലേക്ക് വിതരണം ചെയ്ത പുതിയ അഡ്വാന്സ്ഡ് റോബോട്ടിക് കിറ്റുകള് അത്യാധുനിക സവിശേഷതകളോട് കൂടിയതാണ്. ഐ.ഒ.ടി സംവിധാനങ്ങള് ഒരുക്കുന്നതിന് ആവശ്യമായ വൈഫൈ, ബ്ലൂടൂത്ത് സൗകര്യങ്ങളുള്ള ഇ.എസ്.പി 32 ഡെവലപ്മെന്റ് ബോര്ഡാണ് ഇതിലെ പ്രധാന ഘടകം. ഇതിനുപുറമെ അള്ട്രാസോണിക് ഡിസ്റ്റന്സ്, സോയില് മോയിസ്ചര്, പി.ഐ.ആര് മോഷന്, ലൈന് ട്രാക്കിംഗ് തുടങ്ങിയ വിവിധ സെന്സറുകളും, 4ഡബ്ല്യുഡി സ്മാര്ട്ട് കാര് ഷാസി കിറ്റ്, സബ്മെഴ്സിബിള് മിനി വാട്ടര് പമ്പ് എന്നിവയും ഇതിലുണ്ട്. ഇവ ഉപയോഗിച്ച് സ്മാര്ട്ട് ഇറിഗേഷന് സംവിധാനങ്ങള്, കാഴ്ച പരിമിതര്ക്കുള്ള സ്മാര്ട്ട് ഉപകരണങ്ങള്, സുരക്ഷാ ക്രമീകരണങ്ങള് തുടങ്ങിയ സങ്കീര്ണ്ണമായ പ്രോജക്റ്റുകള് കുട്ടികള്ക്ക് തനിയെ നിര്മ്മിക്കാനാകും. പ്രോജക്റ്റുകള് തയ്യാറാക്കുന്നതിനൊപ്പം ബ്ലോക്ക് കോഡിങ്, പൈത്തണ്, സി എന്നീ പ്രോഗ്രാമിങ് ഭാഷകള് പ്രായോഗികമായി പഠിക്കാനും ഇതിലൂടെ അവസരം ലഭിക്കും. ജില്ലാ ക്യാംപ് ഞായറാഴ്ച സമാപിക്കും.