സിനിമാ സംഘടനകളുടെ സൂചനാ പണിമുടക്കില് നിര്ണ്ണായക യോഗം ഇന്ന്
വിനോദ നികുതി പിന്വലിക്കണമെന്നതടക്കം വിവിധ ആവശ്യങ്ങളുന്നയിച്ച് സംസ്ഥാനത്തെ സിനിമ സംഘടനകള് പ്രഖ്യാപിച്ച സൂചനാ പണിമുടക്കിന് മുന്നോടിയായുള്ള നിര്ണ്ണായക യോഗങ്ങള് ഇന്ന് നടക്കും. സിനിമാ നിര്മ്മാതാക്കളുടെ സംഘടന വിവിധ സംഘടനാ പ്രതിനിധികളുമായി ഇന്ന് രാവിലെയും ഉച്ചതിരിഞ്ഞുമാണ് കൂടിക്കാഴ്ച നടത്തുന്നത്. സമരത്തിന്റെ രീതിയും തുടര്നടപടികളും ഇന്നത്തെ യോഗത്തില് തീരുമാനിക്കും.
സിനിമ മേഖല നേരിടുന്ന സാമ്പത്തിക പ്രതിസന്ധി പരിഹരിക്കാന് സര്ക്കാര് അടിയന്തരമായി ഇടപെടണമെന്നാണ് സംഘടനകളുടെ ആവശ്യം. നിലവിലുള്ള ജിഎസ്ടിക്ക് പുറമെ തദ്ദേശ സ്ഥാപനങ്ങള് ഈടാക്കുന്ന വിനോദ നികുതി പൂര്ണ്ണമായും പിന്വലിക്കണം. വലിയ സാമ്പത്തിക ഭാരം ഉണ്ടാക്കുന്നതിനാല് തിയറ്ററുകള്ക്ക് പ്രത്യേക വൈദ്യുതി താരിഫ് അനുവദിക്കണം. നിര്മ്മാതാക്കള്, വിതരണക്കാര്, തിയറ്റര് ഉടമകള് എന്നിവര് സംയുക്തമായാണ് സമരത്തിന് ആഹ്വാനം ചെയ്തിരിക്കുന്നത്.
സൂചനാ പണിമുടക്കിന് ശേഷവും ആവശ്യങ്ങള് അനുഭാവപൂര്വ്വം പരിഗണിക്കാന് സര്ക്കാര് തയ്യാറായില്ലെങ്കില് അനിശ്ചിതകാല സമരത്തിലേക്ക് നീങ്ങാനാണ് സിനിമാ സംഘടനകളുടെ തീരുമാനം. സമരം ആരംഭിച്ചാല് സംസ്ഥാനത്തെ എല്ലാ തിയറ്ററുകളുടെയും പ്രവര്ത്തനം നിര്ത്തിവയ്ക്കും. പുതിയ സിനിമകളുടെ ചിത്രീകരണവും നിര്മ്മാണ പ്രവര്ത്തനങ്ങളും പൂര്ണ്ണമായും സ്തംഭിക്കും. പ്രതിസന്ധിയിലായ സിനിമാ വ്യവസായത്തെ സംരക്ഷിക്കാന് സര്ക്കാരിന്റെ ഭാഗത്തുനിന്നും അനുകൂലമായ നടപടി ഉണ്ടാകുമെന്ന പ്രതീക്ഷയിലാണ് സിനിമാ പ്രവര്ത്തകര്.
