ശ്രീനഗര് : ജമ്മുകാശ്മീരിലെ ദോഡ ജില്ലയില് സൈനിക വാഹനം കൊക്കയിലേക്ക് മറിഞ്ഞുണ്ടായ അപകടത്തില് പത്ത് സൈനികർക്ക് വീരമൃത്യു.ഏഴ് പേർക്ക് പരിക്കേറ്റു. ഭാദേർവാ-ചമ്പ റോഡില് 200 അടിയുള്ള കൊക്കയിലേക്കാണ് വാഹനം മറിഞ്ഞത്. 17 സൈനികരുമായി സഞ്ചരിച്ചിരുന്ന ബുള്ളറ്റ് പ്രൂഫ് ആർമി വാഹനമാണ് അപകടത്തില്പെട്ടത്. വാഹനം റോഡില് നിന്ന് തെന്നി കൊക്കയിലേക്ക് മറിഞ്ഞതാണ് അപകടത്തിന് കാരണമെന്ന് അധികൃതർ പറഞ്ഞു. സൈന്യവും പൊലീസും സംയുക്തമായിയാണ് രക്ഷാപ്രവർത്തനം നടത്തിയതെന്നും ഉദ്യോഗസ്ഥർ അറിയിച്ചു. അപകടത്തില് സൈനിക വാഹനം പൂർണ്ണമായി തകർന്നു.
ദോഡയില് ഉണ്ടായ റോഡപകടത്തില് സൈനികരുടെ ജീവൻ നഷ്ടപ്പെട്ടതില് അതിയായ ദുഃഖമുണ്ടെന്നും ധീരരായ സൈനികരുടെ മികച്ച സേവനവും പരമമായ ത്യാഗവും നമ്മള് എപ്പോഴും ഓർക്കുമെന്നും ജമ്മു കശ്മീർ ലഫ്റ്റനൻ്റ് ഗവര്ണര് മനോജ് സിന്ഹ പറഞ്ഞു. രാജ്യം മുഴുവൻ മരിച്ച സൈനികരുടെ കുടുംബങ്ങളോടൊപ്പമാണെന്നും മനോജ് സിൻഹ എക്സില് കുറിച്ചു.
ഗുരുതരമായി പരിക്കേറ്റ മൂന്ന് സൈനികരെ ഉദംപൂർ സൈനിക ആശുപത്രിയിലേക്ക് എയർലിഫ്റ്റ് ചെയ്തതുവെന്നും മനോജ് സിന്ഹ അറിയിച്ചു. അവര്ക്ക് ഏറ്റവും മികച്ച ചികിത്സ ഉറപ്പാക്കാന് മുതിര്ന്ന ഉദ്യോഗസ്ഥര്ക്ക് നിര്ദ്ദേശം നല്കി. അവര് എത്രയും വേഗം സുഖം പ്രാപിക്കട്ടെ എന്ന് പ്രാര്ത്ഥിക്കുന്നുവെന്നും അദ്ദേഹം പറഞ്ഞു.