മുസ്ലിംലീഗിൽ നിന്നും നീതി ലഭിച്ചില്ല; ഫാത്തിമ തഹ്ലിയ
മലപ്പുറം: എം.എസ്.എഫിന്‍റെ വനിത വിഭാഗമായ ഹരിതയോട് മുസ്ലിം ലീഗ് നീതി കാണിച്ചില്ലെന്ന് ദേശീയ വൈസ് പ്രസിഡന്‍റ് ഫാത്തിമ തഹ്ലിയ. സ്വാഭാവിക നീതി ഹരിതക്ക് ലഭിച്ചില്ല.എന്നാൽ, പാർട്ടിയിലുള്ള പ്രതീക്ഷ കൈവിടുന്നില്ല. പെൺകുട്ടികളുടെ ശബ്ദമാണ് ഹരിതയെന്ന സംഘടന. പ്രശ്നത്തിൽ എം.എസ്.എഫിനെ പിന്തുണച്ച് മുസ്ലിം ലീഗ് സംസ്ഥാന നേതൃത്വത്തിന് കത്ത് നൽകിയിട്ടുണ്ട്. പാർട്ടിയിലെ ചില നേതാക്കളുടെ പിന്തുണയും തങ്ങൾക്കുണ്ടെന്ന് ഫാത്തിമ തഹ്ലിയ പറഞ്ഞു.
പാർട്ടി വേദിയിലല്ലാതെ മറ്റെവിടെയും പരാതി ഉന്നയിച്ചിട്ടില്ല. പാർട്ടിയിൽ നിന്നുള്ള പരിഹാരം താമസിച്ചപ്പോഴാണ് വനിത കമ്മീഷനെ സമീപിച്ചത്. പ്രയാസത്തോടെയാണെങ്കിലും വനിത കമ്മീഷനിൽ പരാതി നൽകേണ്ട സാഹചര്യമുണ്ടായി. ഹരിത മുസ്ലിം ലീഗിന് ബാധ്യതയാണെന്ന് വരെ വിമർശനമുയർന്നു. ഇത്തരം പരാമർശങ്ങൾ വേദനിപ്പിച്ചു. വനിതകൾക്ക് പ്രവർത്തിക്കാൻ കഴിയാത്ത പ്രസ്ഥാനമാണ് മുസ്ലിം ലീഗെന്ന പ്രചാരണം അംഗീകരിക്കാനാവില്ലെന്നും തഹ്ലിയ പറഞ്ഞു.
ഹരിതക്കെതിരായ നടപടിയിൽ സങ്കടമുണ്ട്. സങ്കടം പാർട്ടിയെ അറിയിക്കും. പ്രശ്നങ്ങൾ തുടർന്നും പാർട്ടിയിൽ വേദിയിൽ ഉന്നയിക്കും. പരാതി പറഞ്ഞവർക്കൊപ്പമാണ് പാർട്ടിയിൽ താൻ നിലകൊള്ളുക. ഇതുമായി ബന്ധപ്പെട്ട വിവാദം ഉയർന്നപ്പോൾ തന്നെ ഇക്കാര്യത്തിൽ നിലപാട് വ്യക്തമാക്കിയതാണെന്നും ഫാത്തിമ തഹ്ലിയ പറഞ്ഞു.
എം.എസ്.എഫിന്‍റെ 11 ജില്ലാ കമ്മിറ്റികൾ പി.കെ.നവാസിനെതിരെ രംഗത്തെത്തിയതായി റിപ്പോർട്ടുണ്ടായിരുന്നു. നവാസിനെ മാറ്റിനിർത്തണമെന്നാണ് കമ്മിറ്റികളുടെ ആവശ്യം. എന്നാൽ, കത്ത് ലഭിച്ചിട്ടില്ലെന്നായിരുന്നു മുസ്ലിം ലീഗ് സംസ്ഥാന ജനറൽ സെക്രട്ടറി പി.എം.എ.സലാമിന്‍റെ വിശദീകരണം.