എംഡിഎംഎ വേട്ട: പിടിയിലായ പ്രതി മൊഴി മാറ്റി? പുതിയ മൊഴിയില്‍ നടിമാരെ കുറിച്ച്‌ പരാമര്‍ശമില്ലെന്ന് സൂചന
മലപ്പുറം: മലപ്പുറത്തെ 510 ഗ്രാം എംഡിഎംഎ വേട്ടയില്‍ പിടിയിലായ കാളികാവ് സ്വദേശിയായ പ്രതി മുഹമ്മദ് ഷബീബ് മൊഴി മാറ്റിയതായി വിവരം.പുതിയ മൊഴിയില്‍ നടിമാരെ കുറിച്ച്‌ പരാമർശമില്ലെന്നാണ് സൂചന. കൊച്ചിയില്‍ നിന്നുള്ള നടിമാർക്ക് നല്‍കാനായാണ് എംഡിഎംഎയുമായി സ്വകാര്യ റിസോർട്ടില്‍ കാത്തു നിന്നതെന്നായിരുന്നു പ്രതി ഇന്നലെ പറഞ്ഞത്. ഡിമാന്‍റ് ഏറെയുള്ള വിദേശ നിർമ്മിത എംഡിഎംഎയ്ക്കായി കൊച്ചിയില്‍ നിന്ന് രണ്ട് നടിമാർ എത്തുമെന്ന് അറിയിച്ചിരുന്നു. ഇവരെ കാത്താണ് റിസോർട്ടില്‍ എത്തിയതെന്നായിരുന്നു ഷബീബ് പൊലീസിന് മൊഴി നല്‍കിയത്. സംഭവത്തില്‍ നടിമാർ ഉള്‍പ്പടെയുള്ളവരുടെ പങ്ക് പൊലീസ് അന്വേഷിച്ച്‌ വരുന്നതിനിടെയാണ് മൊഴിമാറ്റിയത്.
ക്രിസ്തുമസ്, ന്യൂ ഇയർ പാർട്ടികള്‍ക്കായി എംഡിഎംഎ ഉള്‍പ്പെടെയുള്ള ലഹരി മരുന്നുകള്‍ മലപ്പുറത്തേക്ക് എത്തുന്നതായി പൊലീസിന് രഹസ്യ വിവരം കിട്ടിയിരുന്നു. ഇതിന്‍റെ അടിസ്ഥാനത്തിലാണ് വാഴക്കാടിന് സമീപമുള്ള അഴിഞ്ഞില്ലത്തെ റിസോർട്ടില്‍ പൊലീസും ഡാൻസാഫ് ടീമും സംയുക്ത പരിശോധന നടത്തിയത്. ഇതിനിടെയാണ് റിസോർട്ടിന്റെ പാർക്കിങ് ഗ്രൗണ്ടില്‍ നിർത്തിയിട്ടിരുന്ന വാഹനത്തില്‍ നിന്ന് എംഡിഎംഎ കണ്ടെത്തിയത്. വിപണിയില്‍ ലക്ഷക്കണക്കിന് രൂപ വിലവരുന്ന വീര്യം കൂടിയ 510 ഗ്രാം സെമി ക്രിസ്റ്റല്‍ രൂപത്തിലുള്ള എംഡിഎംഎയാണ് പിടികൂടിയത്.