ദില്ലി: സിവില്‍ സർവീസ് ഉദ്യോഗാർത്ഥികളുടെ പരാതിയെ തുടർന്ന് ഓണ്‍ലൈൻ അപേക്ഷാ പ്രക്രിയയില്‍ യുപിഎസ്സി മാറ്റങ്ങള്‍ വരുത്തുന്നു.യൂണിയൻ പബ്ലിക് സർവീസ് കമ്മീഷന്‍റെ (യുപിഎസ്സി) ഈ വർഷത്തെ സിവില്‍ സർവീസ് പ്രിലിമിനറി പരീക്ഷയ്ക്ക് അപേക്ഷിച്ചപ്പോള്‍ സാങ്കേതിക തകരാർ ഉണ്ടായെന്ന് ഉദ്യോഗാർത്ഥികള്‍ പരാതിപ്പെട്ടതിനെ തുടർന്നാണ് ഓണ്‍ലൈൻ അപേക്ഷാ സമ്ബ്രദായത്തില്‍ ചില മാറ്റങ്ങള്‍ കൊണ്ടുവരുന്നതെന്ന് ഔദ്യോഗിക അറിയിപ്പില്‍ പറയുന്നു.
ഓണ്‍ലൈൻ അപേക്ഷ പൂരിപ്പിക്കുന്നതിനുള്ള ഒറ്റത്തവണ രജിസ്ട്രേഷനില്‍ ചില എൻട്രികള്‍ എഡിറ്റ് ചെയ്യാൻ കഴിയും വിധത്തിലാക്കിയിട്ടുണ്ടെന്ന് യുപിഎസ്സി അറിയിച്ചു. അപേക്ഷ സമർപ്പിക്കുന്നതു വരെയും പേര് എപ്പോഴെങ്കിലും മാറ്റിയിട്ടുണ്ടോ, ജെൻഡർ, ന്യൂനപക്ഷ വിഭാഗത്തിലേതാണോ, പത്താം ക്ലാസിലെ റോള്‍ നമ്ബർ എന്നിവയില്‍ കറക്ഷനുണ്ടെങ്കില്‍ വരുത്താം.
അതേസമയം പേര് (പത്താം ക്ലാസിലെ പ്രകാരം), ജനന തീയതി, “പിതാവിന്‍റെ പേര്, അമ്മയുടെ പേര്, മൊബൈല്‍ നമ്ബർ, ഇമെയില്‍ ഐഡി എന്നിവയുമായി ബന്ധപ്പെട്ട കോളങ്ങളില്‍ മാറ്റമൊന്നും വരുത്താൻ കഴിയില്ല.
ഉദ്യോഗാർത്ഥിക്ക് രജിസ്റ്റർ ചെയ്ത മൊബൈല്‍ നമ്ബർ പ്രവർത്തന രഹിതമായാലും രജിസ്റ്റർ ചെയ്ത ഇമെയില്‍ ഐഡി ഉപയോഗിച്ച്‌ മൊബൈല്‍ നമ്ബർ മാറ്റാൻ അപേക്ഷിക്കാം. ഈ സാഹചര്യത്തില്‍, രജിസ്റ്റർ ചെയ്ത ഇമെയില്‍ ഐഡിയിലേക്ക് ഒരു ഒടിപി അയയ്‌ക്കുമെന്ന് കമ്മീഷൻ അറിയിച്ചു.
ഇ മെയില്‍ ഐഡിയിലേക്കുള്ള ആക്‌സസ് നഷ്‌ടപ്പെട്ടാല്‍ മൊബൈല്‍ നമ്ബർ വഴി ഇമെയില്‍ ഐഡി മാറ്റാൻ അപേക്ഷ നല്‍കാം. രജിസ്റ്റർ ചെയ്ത മൊബൈല്‍ നമ്ബറിലേക്ക് ഒരു ഒടിപി അയയ്ക്കും. അതേസമയം ഉദ്യോഗാർത്ഥിക്ക് രജിസ്റ്റർ ചെയ്ത മൊബൈലിലേക്കും രജിസ്റ്റർ ചെയ്ത ഇമെയില്‍ ഐഡിയിലേക്കും പ്രവേശിക്കാൻ കഴിയുന്നില്ലെങ്കില്‍ മെട്രിക്കുലേഷൻ സർട്ടിഫിക്കറ്റ്, ആധാർ കാർഡ്/ പാൻ കാർഡ്/ പാസ്‌പോർട്ട്/ ഡ്രൈവിംഗ് ലൈസൻസ്, സമീപകാലത്തെടുത്ത പാസ്‌പോർട്ട് സൈസ് ഫോട്ടോ, എന്നിവയ്‌ക്കൊപ്പം ആവശ്യമായ മാറ്റങ്ങള്‍ വരുത്തുന്നതിന് (otrupsc@gov.in) കമ്മീഷനില്‍ അപേക്ഷ അയയ്‌ക്കേണ്ടതാണ്.
ഇന്ത്യൻ അഡ്മിനിസ്ട്രേറ്റീവ് സർവീസ് (ഐഎഎസ്), ഇന്ത്യൻ ഫോറിൻ സർവീസ് (ഐഎഫ്‌എസ്), ഇന്ത്യൻ പൊലീസ് സർവീസ് (ഐപിഎസ്) എന്നിങ്ങനെ ഉദ്യോഗസ്ഥരെ തെരഞ്ഞെടുക്കുന്നതിനായി പ്രിലിമിനറി, മെയിൻ, ഇന്‍റർവ്യൂ എന്നിങ്ങനെ മൂന്ന് ഘട്ടങ്ങളിലായാണ് യുപിഎസ്സി വർഷം തോറും സിവില്‍ സർവീസ് പരീക്ഷ നടത്തുന്നത്. പ്രിലിമിനറി പരീക്ഷയ്ക്ക് രജിസ്‌ട്രേഷനുള്ള അവസാന തിയ്യതി ഫെബ്രുവരി 18 വരെ നീട്ടിയിട്ടുണ്ട്.
http://upsconline.gov.in എന്ന വെബ്സൈറ്റ് ഉപയോഗിച്ച്‌ ഓണ്‍ലൈനായി അപേക്ഷിക്കണം. മെയ് 25നാണ് പ്രിലിമിനറി പരീക്ഷ.