സുബീറ ഫർഹത്തിനെ കൊലപ്പെടുത്തി മൂന്നു മണിക്കൂർ കഴിഞ്ഞ് കുഴിച്ചിട്ടു

വളാഞ്ചേരി: കഞ്ഞിപ്പുര ചോറ്റൂരിലെ കിഴക്കത്ത് പറമ്പാട്ട് കബീറിന്റെ മകൾ സുബീറ ഫർഹത്തി(21)നെ കുഴിച്ചിട്ടത് കൊലപ്പെടുത്തി മൂന്നു മണിക്കൂർ കഴിഞ്ഞ്. തെളിവെടുപ്പിനു കൊണ്ടുവന്ന പ്രതിയും സുബീറ ഫർഹത്തിന്റെ അയൽവാസിയുമായ വരിക്കോടൻ അൻവർ(38) ഒട്ടും കൂസലില്ലാതെയായിരുന്നു പോലീസിനോട് കുറ്റംസമ്മതിച്ചത്.

മാർച്ച് പത്തിന് രാവിലെ ഫർഹത്ത് വെട്ടിച്ചിറയിലെ സ്ഥാപനത്തിലേക്ക് പോകുമ്പോഴായിരുന്നു സ്വർണാഭരണം കവർന്നെടുക്കുന്നതിനായി കൊലപാതകം നടന്നത്.

മുഖം പൊത്തിപ്പിടിച്ച് കൊലപ്പെടുത്തിയശേഷം പറമ്പിലെ കുറ്റിക്കാട്ടിൽ ഒളിപ്പിച്ചുവെക്കുകയായിരുന്നു. ഉച്ചയ്ക്ക് പന്ത്രണ്ടിന് കൈക്കോട്ടുമായി സ്ഥലത്തെത്തി മൃതദേഹം ചാക്കിലാക്കി. കുഴിയെടുത്ത് മണ്ണിട്ടു മൂടിയെന്നും കുറ്റസമ്മതം നടത്തിയതായി പോലീസ് പറഞ്ഞു. അൻവർ ധരിച്ചിരുന്ന മാസ്ക്, ചെരിപ്പ് എന്നിവയും സ്ഥലത്തുനിന്ന് കണ്ടെടുത്തിട്ടുണ്ട്. ഇവയും പരിശോധനയ്ക്കയക്കും.