വിദേശ മദ്യഷാപ്പുകൾക്ക് മുന്നിൽ ജനം തടിച്ചുകൂടുന്നത് ആശങ്കയുണ്ടാക്കുന്നതായി ഹൈകോടതി.

കൊച്ചി: കോവിഡ്​ മാനദണ്ഡങ്ങൾ പാലിക്കാതെ വിദേശ മദ്യഷാപ്പുകൾക്ക്​ മുന്നിൽ ജനം തടിച്ചുകൂടുന്നത്​ ആശങ്കയുണ്ടാക്കുന്നതായി ഹൈകോടതി. മാധ്യമ വാർത്തകളുടെ അടിസ്ഥാനത്തിൽ ജസ്​റ്റിസ്​ ദേവൻ രാമചന്ദ്രൻ നൽകിയ കത്തി​െൻറ അടിസ്ഥാനത്തിൽ സ്വമേധയാ സ്വീകരിച്ച ഹരജിയിലാണ്​ ചീഫ്​ ജസ്​റ്റിസ്​ എസ്​. മണികുമാർ, ജസ്​റ്റിസ്​ ഷാജി പി. ചാലി എന്നിവരടങ്ങു​ന്ന ഡിവിഷൻ ബെഞ്ചി​െൻറ നിരീക്ഷണം. ഇത്​ കണ്ടില്ലെന്ന്​ നടിക്കാനാവില്ലെന്ന്​ അഭിപ്രായപ്പെട്ട കോടതി സർക്കാറി​ന്റെ വിശദീകരണവും തേടി. അടുത്ത ചൊവ്വാഴ്ചക്കകം വിശദീകരണം നൽകാനാണ്​ നിർദേശം.

അതേസമയം, വിദേശമദ്യം വാങ്ങാൻ ഔട്ട്​​ലെറ്റുകളിലെത്തുന്നവരുടെ നിര പൊതുനിരത്തിലേക്ക് നീളുന്നില്ലെന്ന് ഉറപ്പാക്കണമെന്നും മദ്യം വാങ്ങാനെത്തുന്നവർക്ക് അടിസ്ഥാന സൗകര്യമൊരുക്കണമെന്നുമുള്ള 2017 ജൂലൈ അഞ്ചിലെ ഉത്തരവ്​ പാലിക്കാത്തതിനെതിരായ കോടതിയലക്ഷ്യ ഹരജി ജസ്​റ്റിസ്​ ദേവൻ രാമചന്ദ്ര​‍ന്റെ ബെഞ്ചിലെത്തി. ഇത്​ വ്യാഴാഴ്​ച പരിഗണിക്കും.

ആൾക്കൂട്ടം ഒഴിവാക്കി കർശനമായി സമൂഹ അകലം പാലിക്കാൻ നിർദേശം നൽകിയെന്ന് സർക്കാർ വിശദീകരിച്ചെങ്കിലും വീഴ്ചയുണ്ടോയെന്ന്​ പരിശോധിക്കേണ്ടതുണ്ടെന്ന് ഡിവിഷൻ ബെഞ്ച് വ്യക്തമാക്കി. രണ്ട്​ ഹരജിയിലും സർക്കാറും എക്സൈസ് വകുപ്പും ബിവറേജസ് കോർപറേഷനുമാണ്​ എതിർകക്ഷികൾ. തൃശൂർ കുറുപ്പംറോഡിലെ ബിവറേജസ് ഔട്ട്​ലെറ്റിലെ ക്യൂ കച്ചവടത്തെ ബാധിക്കുന്നെന്ന്​ ആരോപിച്ച് സമീപത്തെ ഹിന്ദുസ്ഥാൻ പെയിന്റ്സ്​ നൽകിയ ഹരജിയിലാണ്​ 2017ൽ സിംഗിൾ ബെഞ്ചി​ന്റെ വിധിയുണ്ടായത്​.

മദ്യം വാങ്ങാൻ വരുന്നവരെ പൊതുനിരത്തിൽ വരിനിർത്തുന്നത് അപമാനകരമാണെന്നത്​ അടക്കം ചൂണ്ടിക്കാട്ടിയായിരുന്നു വിധി. നാലുവർഷം കഴിഞ്ഞിട്ടും ഉത്തരവ്​ പാലിച്ചില്ലെന്ന്​ ആരോപിച്ചാണ്​ കോടതിയലക്ഷ്യ ഹരജി.