തീവണ്ടിയിൽ യുവതിക്കുനേരെ പീഡനശ്രമം: പ്രതി ചാടി രക്ഷപ്പെട്ടു

കോഴിക്കോട്: എറണാകുളം-കണ്ണൂർ എക്സിക്യുട്ടീവ് ട്രെയിനിൽ ബുധനാഴ്ച രാത്രി ഒമ്പതുമണിയോടെയാണ് ചാത്തമംഗലം സ്വദേശിനിയായ 43 കാരിക്ക് നേരെയാണ് ആക്രമണം ഉണ്ടായത്. യുവതി അപായച്ചങ്ങല വലിച്ചതിനെത്തുടർന്ന് പ്രതി തീവണ്ടിയിൽ നിന്ന് ചാടി രക്ഷപ്പെട്ടു.

എറണാകുളത്ത് ഹോം നഴ്സായി ജോലിചെയ്യുന്ന യുവതി കോഴിക്കോട്ടെ വീട്ടിലേക്ക് വരുകയായിരുന്നു. തീവണ്ടിയിലെ അവസാന കമ്പാർട്ട്മെന്റിൽ യാത്രചെയ്യവേ ഒപ്പമുണ്ടായിരുന്ന യാത്രക്കാരനാണ് അപമാനിക്കാൻ ശ്രമിച്ചത്. മറ്റൊരു കുടുംബവും ഇതേ കമ്പാർട്ട്മെന്റിലുണ്ടായിരുന്നു. യുവതി ബഹളംവെച്ചതിനെത്തുടർന്ന് കുടുംബം ഇയാളെ തടയാൻ ശ്രമിച്ചെങ്കിലും ഇയാൾ ചാടിരക്ഷപ്പെടുകയായിരുന്നു.
മദ്യലഹരിയിലായിരുന്ന പ്രതി തൃശ്ശൂരിൽ നിന്ന് കയറിയതുമുതൽ ശല്യപ്പെടുത്താൻ തുടങ്ങിയെന്നും,

തിരൂർ വിട്ടശേഷം അക്രമം ഭയന്ന് ചങ്ങല വലിച്ച് ട്രെയിൻ നിർത്തുകയായിരുന്നുവെന്നും യുവതിയുടെ പരാതിയിൽ പറയുന്നു. പ്രതിയെ തിരിച്ചറിയാനായിട്ടില്ല. കോഴിക്കോട് റെയിൽവേ പോലീസ് അന്വേഷണമാരംഭിച്ചു.