ട്രെയിനുകളിൽ മോഷണം പതിവാക്കിയ രണ്ട് തിരൂർ സ്വദേശികൾ പിടിയിൽ
കൊല്ലം: ട്രെയിനുകളില്‍ സ്ഥിരം മോഷണം നടത്തിയിരുന്ന യുവാക്കള്‍ കൊല്ലം റെയില്‍വേ പപൊലീസിന്റെ പിടിയില്‍. കഴിഞ്ഞ ദിവസം കൊല്ലം റെയില്‍വേസ്റ്റേഷനില്‍ സംശയകരമായ സാഹചര്യത്തില്‍ കണ്ട മലപ്പുറം തിരൂര്‍ സ്വദേശികളായ തെക്കൻ കൂറ്റൂർ ആലുക്കൽ വീട്ടിൽ ജുനൈദ്(26),തേവർകുളത്തിൽ വീട്ടിൽ നിഹാദ് (22) എന്നിവരാണ് കൊല്ലം റെയില്‍വേ പോലീസ് പിടികൂടിയത്.
എസ്.എച്ച്‌.ഒ ആര്‍.എസ്. രഞ്ജുവിന്റെ നേതൃത്വത്തില്‍ നടത്തിയ ചോദ്യം ചെയ്യലിലാണ് ഇവര്‍ ട്രെയിനുകളിലെ സ്ഥിരം മോഷ്ടടാക്കളാണെന്ന് വ്യക്തമായത്. ഇവരുടെ കൈയില്‍ നിന്ന് അഞ്ച് മൊബൈല്‍ ഫോണും 10,000 രൂപയും ഒരു പഴ്സും കണ്ടെടുത്തു. ജുനൈദ് നിരവധി മോഷണക്കേസിലെ പ്രതിയാണ്.
മലപ്പുറം ജില്ലയിലെ അഞ്ചോളം സ്റ്റേഷനുകളില്‍ മോഷണക്കേസുകളും എന്‍.ഡി.പി.എസ് കേസുകളുമുള്ള ജുനൈദ് മുൻപ് ജയില്‍ശിക്ഷ അനുഭവിച്ചിട്ടുള്ളയാളാണ്.
ഇവരെ റിമാന്‍ഡ് ചെയ്തു. കൊട്ടാരക്കര സബ് ജയിലില്‍ എത്തിച്ചപ്പോള്‍ പൊലീസുകാരെ ചവിട്ടി വീഴ്ത്തി രക്ഷപ്പെടാന്‍ ശ്രമിച്ച നിഹാദിനെതിരെ കൊട്ടാരക്കര പൊലീസ് കേസെടുത്തിട്ടുണ്ട്. സി.പി.ഒമാരായ ജിനദേവ്, കെ.ആര്‍. രാജേഷ്, ഷൈന്‍ മോന്‍ , എസ്. ബിജു, അനില്‍കുമാര്‍, സതീഷ്‌ ചന്ദ്രന്‍, ഡി. ജോസ്, പ്രശാന്ത്, ഡയാന എന്നിവരും പ്രതികളെ അറസ്റ്റ് ചെയ്ത സംഘത്തിലുണ്ടായിരുന്നു