തേഞ്ഞിപ്പലത്ത് വീട്ടമ്മക്ക് വിവാഹ വാഗ്ദാനം നല്‍കി ലൈംഗികമായി പീഡിപ്പിച്ച് ഒളിവില്‍ പോയ യുവാവ് അറസ്റ്റില്‍
മലപ്പുറം: ഭര്‍തൃമതിയായ വീട്ടമ്മയെ പ്രണയം നടിച്ച് ദിവസങ്ങളോളം കൂടെ താമസിപ്പിച്ച്
പീഡനത്തിനിരയാക്കിയ ശേഷം കടന്നു കളഞ്ഞ യുവാവിനെ തേഞ്ഞിപ്പലം പൊലിസ് അറസ്റ്റ് ചെയ്തു. വള്ളുവമ്പ്രം പുല്ലാര സ്വദേശി കപ്രക്കാട്ട് നിഷാദ് 27 നെയാണ് അറസ്റ്റ് ചെയ്തത്.
സൗണ്ട് എന്‍ജിനീയറായ ഇയാള്‍ നാട്ടുകാരിയായ വീട്ടമ്മയെ വിവാഹ വാഗ്ദാനം നല്‍കി പെരുവള്ളൂര്‍ പറമ്പില്‍ പീടികയിലെ വാടക കോര്‍ട്ടേഴ്‌സില്‍ രണ്ട് മാസത്തോളം ഒന്നിച്ച് താമസിപ്പിച്ച് ലൈംഗികമായി പീഡനത്തിനിരയാക്കിയ ശേഷം കടന്നു കളയുകയായിരുന്നുവെന്ന വീട്ടമ്മയുടെ പരാതിയിലാണ് പൊലിസ് അറസ്റ്റ് ചെയ്തത്.
കഴിഞ്ഞ ഫെബ്രുവരിയിലാണ് തേഞ്ഞിപ്പലം പൊലിസില്‍ വീട്ടമ്മ പരാതി നല്‍കിയത്. തുടര്‍ന്ന് പൊലിസ് അന്വേഷണം ആരംഭിച്ചെങ്കിലും നിഷാദ് ഒളിവിലായിരുന്നു. വള്ളുവമ്പ്രത്ത് ഇയാള്‍ എത്തിയതായ രഹസ്യ വിവരം ലഭിച്ചതിനെ തുടര്‍ന്ന് തേഞ്ഞിപ്പലം സബ് ഇന്‍സ്‌പെക്ടര്‍ സംഗീത് പുനത്തില്‍, സി.പി.ഒമാരായ സബീഷ്, ബിജു, ഹോം ഗാര്‍ഡ് പ്രശാന്ത്, സൈതലവി എന്നിവരടങ്ങുന്ന പൊലിസ് സംഘം വള്ളുവമ്പ്രം ടൗണില്‍ വെച്ച് അറസ്റ്റു ചെയ്യുകയായിരുന്നു. ഇന്നലെ വൈകിട്ടോടെ കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു.