പാലക്കാട് ഹോട്ടലിൽ തീപിടിത്തം; സ്ത്രീയടക്കം രണ്ട് പേർ മരിച്ചു
പാലക്കാട്: ഹോട്ടലിലുണ്ടായ തീ പിടിത്തത്തിൽ രണ്ടുമരണം.പാലക്കാട് മണ്ണാർക്കാട് നെല്ലിപ്പുഴയിലെ ഹിൽവ്യൂ എന്ന നാലുനില ഹോട്ടലിലാണ് തീപിടിത്തമുണ്ടായത്. ഒരു സ്ത്രീയും പുരുഷനുമാണ് മരിച്ചത്.
പുലർച്ചെ മൂന്നേകാലോടെയാണ് അപകടമുണ്ടായത്. താഴത്തെ നിലയിൽ ഹോട്ടലും മുകൾ നിലകളിൽ ലോഡ്ജുമാണ് പ്രവർത്തിച്ചിരുന്നത്. താഴത്തെ നിലയിൽ നിന്നാണ് തീ പടർന്നത്. ഉടൻതന്നെ അവിടെ ഉണ്ടായിരുന്ന ജീവനക്കാർ പുറത്തേക്കോടി രക്ഷപ്പെട്ടു.ഇവർ വിവരമറിയിച്ചതിനെ തുടർന്ന് ഫയർഫോഴ്സ് എത്തി തീ അണച്ചശേഷം നടത്തിയ തിരച്ചിലിലാണ് മുകൾ നിലയിലെ മുറിക്കുള്ളിൽ ഒരു സ്ത്രീയെയും പുരുഷനെയും അബോധാവസ്ഥയിൽ കണ്ടത്. ഇരുവരെയും ഉടൻ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.
മരിച്ച തൊഴിലാളികള്‍ മലപ്പുറം കോട്ടയ്ക്കല്‍ സ്വദേശികളാണ്. എന്നാല്‍, ഇവരുടെ പേരുവിവരങ്ങള്‍ ലഭ്യമായിട്ടില്ല. ഒരാള്‍ കുടുങ്ങിക്കിടക്കുന്നുവെന്നാണ് ആദ്യം വിവരം ലഭിച്ചത്. ഫയര്‍ഫോഴ്‌സ് എത്തി തീയണച്ചതോടെയാണ് മരണം സ്ഥിരീകരിച്ചത്. കൂടുതല്‍ മരണങ്ങളില്ലെന്നാണ് വിവരം.
ലോഡ്ജിലെ രേഖകൾ മുഴുവൻ നശിച്ചതിനാൽ എവിടത്തുകാരാണെന്ന് വ്യക്തമല്ല. പുകശ്വസിച്ചതാണ് ഇവരുടെ മരണത്തിനിടയാക്കിയതെന്നാണ് കരുതുന്നത്. ഷോർട്ട് സർക്യൂട്ടാണ് അപകടത്തിന് കാരണമായതെന്നാണ് പ്രാഥമിക നിഗമനം.