ചരക്ക് ട്രെയിൻ പാളം തെറ്റി; ട്രെയിനുകൾ വൈകും

തൃശൂർ: തൃശൂർ -പുതുക്കാട് റൂട്ടിൽ തെക്കേ തുറവ് ഭാഗത്ത് ചരക്ക് ട്രെയിൻ പാളം തെറ്റി. എഞ്ചിനും നാലു ബോഗികളുമാണ് പാളം തെറ്റിയത്. പുതുക്കാട് റെയിൽവേ സ്റ്റേഷന് സമീപത്താണ് അപകടം നടന്നത്. ഇരുമ്പനം ബിപിസിഎല്ലിൽ നിന്നും ഇന്ധനം നിറയ്‌ക്കാൻ പോയ ചരക്ക് തീവണ്ടിയാണ് അപകടത്തിൽ പെട്ടത്.

തൃശൂർ – എറണാകുളം റൂട്ടിൽ ട്രെയിൻ ഗതാഗതം ഭാഗികമായി തടസപ്പെട്ടിരിക്കുകയാണ്. റെയിൽവേ ഉദ്യോഗസ്ഥരും വിദഗ്ദ്ധരും സ്ഥലത്ത് എത്തിയിട്ടുണ്ട്. അപകടകാരണം വ്യക്തമല്ല. നിലവിൽ ഒരു വരിയിലൂടെ ട്രെയിൻ വിട്ടു തുടങ്ങിയിട്ടുണ്ട്. കൊച്ചുവേളി എക്സ്പ്രസും,​ മംഗള എക്സ്പ്രസും അല്പസമയം മുമ്പ് ഇതുവഴി കടത്തി വിട്ടു. ഏറനാട് എക്സ്പ്രസും വേണാടും ജനശതാബ്‌ദിയുമടക്കമുള്ള ട്രെയിനുകൾ വൈകും.