പിടികിട്ടാപ്പുള്ളിയായ പരുന്ത് ഹാരിസിനെ വഴിക്കടവ് പോലീസ് അറസ്റ്റു ചെയ്തു.
മലപ്പുറം: പിടികിട്ടാപ്പുള്ളിയായ മോഷ്ടാവിനെ വഴിക്കടവ് പോലീസ് അറസ്റ്റു ചെയ്തു. കണ്ണൂർ എടക്കാട് സ്വദേശി ഹാരിസ് പുതിയാണ്ടി എന്ന പരുന്ത് ഹാരിസി (47) നെയാണ് പോലീസ് പിടികൂടിയത്. 15 വർഷങ്ങൾക്ക് മുമ്പ് വഴിക്കടവിൽ നിന്നും കാർ വാടകക്കെടുത്ത് വീടുകളിൽ നിന്നും റബ്ബർ ഷീറ്റുകൾ മോഷണം നടത്തി കടത്തിക്കൊണ്ടുപോയ സംഘത്തിലെ കണ്ണിയാണ് പ്രതി.
നിരവധി മോഷണക്കേസുകളിൽ പ്രതിയാണ് പരുന്ത് ഹാരിസ്. കുറച്ച് ദിവസമായി പ്രതിയെ പോലീസ് നിരീക്ഷിച്ചു വരികയായിരുന്നു. ഇതിനിടയിൽ കണ്ണൂർ എടക്കാട് സ്റ്റേഷൻ പരിധിയിൽ കാഞ്ഞങ്ങാട്ട് പള്ളിക്കടുത്ത് ഒളിവിൽ കഴിയവെയാണ് പ്രതി പോലീസ് പിടിയിലായത്. മലപ്പുറം ജില്ലാ പോലീസ് മേധാവിയുടെ നിർദേശാനുസരണം വഴിക്കടവ് ഇൻസ്പെക്ടർ പി അബ്ദുൾ ബഷീറിൻ്റെ നേതൃത്വത്തിലുള്ള പ്രത്യേക അന്വേഷണ സംഘമാണ് പ്രതിയെ പിടികൂടിയത്.
അന്വേഷണ സംഘത്തിൽ പോലീസുകാരായ റിയാസ് ചീനി, അനീഷ് എം എസ്, പ്രശാന്ത് കുമാർ എസ്, എടക്കാട് പോലീസ് സ്റ്റേഷനിലെ റിനോജ് എന്നിവരും ഉണ്ടായിരുന്നു. പ്രതിയെ നിലമ്പൂർ കോടതിയിൽ ഹാജരാക്കി മഞ്ചേരി സബ് ജയിലിലേക്ക് റിമാൻഡ് ചെയ്തു.
