സ്കൂട്ടറും കാറും കൂട്ടിയിടിച്ച് അപകടം: പരിക്കേറ്റ പൊലീസുകാരി മരിച്ചു
പത്തനംതിട്ട: വാഹനാപകടത്തിൽ പരിക്കേറ്റ് ചികിത്സയിൽ കഴിഞ്ഞിരുന്ന പൊലീസുകാരി മരിച്ചു. പത്തനംതിട്ട വനിതാ പൊലീസ് സ്റ്റേഷനിലെ സിപിഒ സിൻസി പി.അസീസാണ് (35) മരിച്ചത്. ഇക്കഴിഞ്ഞ പതിനൊന്നിന് കിടങ്ങന്നൂരിനു സമീപത്തുവച്ച് സിൻസി ഓടിച്ചിരുന്ന സ്കൂട്ടർ കാറുമായി കൂട്ടിയിടിക്കുകയായിരുന്നു.
വൈകുന്നേരം മൂന്നരയോടെയുണ്ടായ അപകടത്തിൽ തലയ്ക്ക് ഗുരുതരമായി പരിക്കേറ്റ് റോഡിൽ കിടന്ന സിൻസിയെ ആശുപത്രിയിലെത്തിച്ചത് ഏറെ വൈകിയാണ്. വിവരമറിഞ്ഞ് ഇലവുതിട്ട പൊലീസ് സ്റ്റേഷനിൽ നിന്ന് പൊലീസുകാരെത്തിയാണ് സിൻസിയെ ആശുപത്രിയിൽ എത്തിച്ചത്. അപ്പോഴേക്കും ശരീരത്തിൽ നിന്ന് ഏറെ രക്തം നഷ്ടമായിരുന്നു. തലയ്‌ക്കേറ്റ പരിക്കായിരുന്നു മരണ കാരണം.
സിൻസിയെ ആദ്യം കോഴഞ്ചേരിയിലെ സ്വകാര്യ ആശുപത്രിയിലും അവിടെനിന്ന് കല്ലിശേരിയിലെ സ്വകാര്യ ആശുപത്രിയിലേക്കും മാറ്റിയിരുന്നു.സ്ത്രീകൾക്കും കുട്ടികൾക്കും സെൽഫ് ഡിഫൻസ് പരിശീലനം നൽകുന്ന ചുമതല വഹിക്കുകയായിരുന്നു സിൻസി.