എട്ട് ജില്ലകളില്‍ വീണ്ടും അതിതീവ്ര മഴ മുന്നറിയിപ്പ്; അതീവ ജാഗ്രതാ നിര്‍ദ്ദേശം
തിരുവനന്തപുരം: സംസ്ഥാനത്ത് വീണ്ടും മഴ ശക്തമാകുന്നുവെന്ന മുന്നറിയിപ്പ്. എട്ട് ജില്ലകളില്‍ റെഡ് അലര്‍ട്ട് പ്രഖ്യാപിച്ചിട്ടുണ്ട്. ഇന്ന് രാവിലെ മുതല്‍ തന്നെ മധ്യകേരളത്തിലെ ജില്ലകളില്‍ കനത്ത മഴയാണ് പെയ്യുന്നത്. ഇതിന് പിന്നാലെയാണ് അതിതീവ്ര മഴ മുന്നറിയിപ്പ് നല്‍കിയിരിക്കുന്നത്. പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂര്‍, പാലക്കാട്, കണ്ണൂര്‍ ജില്ലകളിലാണ് റെഡ് അലര്‍ട്ട് പ്രഖ്യാപിച്ചിരിക്കുന്നത്. കൊല്ലം, മലപ്പുറം, വയനാട്, കാസര്‍കോട് ജില്ലകളില്‍ ഓറഞ്ച് അലര്‍ട്ടും തിരുവനന്തപുരത്ത് യെല്ലോ അലര്‍ട്ടും പ്രഖ്യാപിച്ചിട്ടുണ്ട്.
എട്ട് ജില്ലകളില്‍ അതിതീവ്ര മഴയ്‌ക്കുള്ള സാധ്യതയുണ്ടെന്നാണ് കാലാവസ്ഥാ നിരീക്ഷണ കേന്ദ്രം പറയുന്നത്. അറബിക്കടലില്‍ നിന്നുള്ള പടിഞ്ഞാറന്‍ കാറ്റ് ശക്തമാണ്. ചക്രവാതച്ചുഴിയുടെ സ്വാധീനവുമുണ്ട്. അതുകൊണ്ട് തന്നെ വരും മണിക്കൂറുകളില്‍ കാര്യമായ മഴ പ്രതീക്ഷിക്കാമെന്നാണ് വിലയിരുത്തല്‍. കോട്ടയം, ഇടുക്കി, എറണാകുളം ജില്ലകളിലെ മലയോര മേഖലകളിലും അതിശക്തമായ മഴ പെയ്യുമെന്നാണ് അറിയിപ്പ്. ഒറ്റപ്പെട്ട മഴയായിരിക്കും ഇവിടെ ലഭിക്കുക. മഴ മുന്നറിയിപ്പ് നല്‍കിയിട്ടുള്ള എല്ലാ ജില്ലകളിലും അതീവ ജാഗ്രതാ നിര്‍ദ്ദേശമാണ് നല്‍കിയിരിക്കുന്നത്.
രാത്രിയോട് കൂടി പാലക്കാട് മുതല്‍ വടക്കോട്ടുള്ള ജില്ലകളില്‍ മലയോരമേഖലകളില്‍ കിഴക്കന്‍ പാതിയിലേക്ക് കൂടുതല്‍ മഴയ്‌ക്ക് സാധ്യതയുണ്ട്. നാളെ ഇടുക്കി, കോഴിക്കോട്, കണ്ണൂര്‍, വയനാട് ജില്ലകളില്‍ നാളെ ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്.