രണ്ട് അധ്യാപകർക്കെതിരെ നടപടി.വി ഡി സവർക്കറുടെ വേഷം കെട്ടി വിദ്യാർഥി എത്തിയ സംഭവത്തിലാണ് നടപടി.

മലപ്പുറം: സ്വാതന്ത്ര്യദിന ആഘോഷ പരിപാടിയിൽ പങ്കെടുക്കാനായി വി ഡി സവർക്കറുടെ വേഷം കെട്ടി വിദ്യാർഥി എത്തിയ സംഭവത്തിൽ രണ്ട് അധ്യാപകർക്കെതിരെ നടപടി. കീഴുപറമ്പ് ജിവിഎച്ച്എസ് സ്കൂളിലെ രണ്ട് അധ്യാപകരോട് നിർബന്ധിത അവധിയിൽ പ്രവേശിക്കാൻ സ്കൂൾ അധികൃതർ ആവശ്യപ്പെട്ടു. കീഴുപറമ്പ് ജിവിഎച്ച്എസ് സ്കൂളിൽ തിങ്കളാഴ്ച നടന്ന സ്വാതന്ത്ര്യദിന ആഘോഷ പരിപാടിയുടെ ഭാഗമായുള്ള ഘോഷയാത്രയിൽ പങ്കെടുക്കാനായാണ് വി ഡി സവർക്കറുടെ വേഷം കെട്ടി വിദ്യാർഥി എത്തിയത്.

സംഭവം വലിയ വിവാദങ്ങൾക്ക് ഇടയാക്കിയിരുന്നു. ഗുരുതര വീഴ്ചയുണ്ടാവർക്കെതിരെ നടപടി എടുക്കണമെന്ന് ആവശ്യപ്പെട്ട് വിവിധ രാഷ്ട്രീയ, വിദ്യാർഥി സംഘടനകൾ സ്കൂൾ അധികൃതർക്ക് പരാതി നൽകിയിരുന്നു. തുടർന്ന് സ്കൂൾ അധികൃതർ സംഭവം അന്വേഷിക്കാൻ അഞ്ചംഗ സമിതിയെ രൂപീകരിച്ചു. ഇവർക്ക് മുമ്പിൽ അധ്യാപകർ വിശദീകരണം നൽകി. പരിപാടികൾക്കിടയിൽ പിഴവ് പറ്റി പോയതാണെന്നാണ് അധ്യാപകരുടെ വിശദീകരണം. അതിൽ ക്ഷമ ചോദിക്കുന്നുവെന്ന് അന്വേഷണ കമ്മിറ്റിക്കു മുമ്പാകെ അധ്യാപകർ അറിയിച്ചു.

പ്രതിഷേധങ്ങൾ തുടരുന്ന സാഹചര്യത്തിലാണ് സ്കൂൾ അധികൃതർ രണ്ട് അധ്യാപകരോടും അന്വേഷണവിധേയമായി നിർബന്ധിത അവധിയിൽ പ്രവേശിക്കാൻ ആവശ്യപ്പെട്ടത്. അതേസമയം ലിസ്റ്റിൽ ഉൾപ്പെടാത്ത സ്വാതന്ത്ര്യസമര സേനാനികളുടെ കൂട്ടത്തിൽ വി ഡി സവർക്കറെ ഉൾപ്പെടുത്താൻ ശ്രമം നടത്തിയതിനെ സ്കൂൾ പിടിഎ പ്രസിഡൻ്റ് എം ഇ ഫസൽ, എസ്എംസി ചെയർമാൻ എം എം മുഹമ്മദ് എന്നിവർ അപലപിച്ചു.