പ്രദർശന മേളയിൽ എക്‌സ്പ്രസ് മാർട്ടുമായി സപ്ലൈകോ

കാലത്തിനൊത്ത് മാറിക്കൊണ്ടിരിക്കുന്ന സപ്ലൈകോയുടെ കാഴ്ച്ചകളുമായി പൊന്നാനി എ.വി.എച്ച്.എസ്.എസ് മൈതാനത്ത് എക്‌സ്പ്രസ് മാർട്ട് തുറന്നു. സംസ്ഥാന സർക്കാരിന്റെ രണ്ടാം വാർഷികത്തോടുബന്ധിച്ച് മെയ് 10 മുതൽ 16 വരെ നടക്കുന്ന എന്റെ കേരളം പ്രദർശന-വിപണന മേളയിലാണ് സപ്ലൈകോയുടെ ആധുനിക ഔട്ട്‌ലെറ്റ് സജ്ജീകരിക്കുന്നത്. എഫ്.എം.സി.ജി  ഉത്പന്നങ്ങൾക്കും സപ്ലൈകോയുടെ ശബരി ഉത്പന്നങ്ങൾക്കും വൻ വിലക്കിഴവും ആകർഷകമായ ഓഫറുകളും ഇവിടെയുണ്ട്. മേള സന്ദർശിക്കാൻ എത്തുന്നവർക്കായി ഒരു മിനി സൂപ്പർ മാർക്കറ്റ് തന്നെയാണ് സപ്ലൈകോ ഒരുക്കിയിരിക്കുന്നത്. സപ്ലൈകോ ശബരി ഹോട്ടൽ ബ്ലെൻഡ് തേയില 500ഗ്രാം വാങ്ങിയാൽ ശബരി എസ്.എഫ്.ഡി തേയില 250 ഗ്രാം സൗജന്യമായി നൽകും. ശബരി ഗോൾഡ് തേയില 250 ഗ്രാം വാങ്ങിയാൽ ശബരി എസ്.എഫ്.ഡി 100ഗ്രാം സൗജന്യമായി നൽകും. ഇതിനു പുറമേ തേയിലയ്ക്ക് വിലക്കുറവും നൽകുന്നുണ്ട്. സ്റ്റാളിലെ ഏറ്റവും പ്രധാന ആകർഷണം രണ്ട് ലിറ്റർ ശബരി വെളിച്ചെണ്ണയോടൊപ്പം ഒരു ലിറ്റർ ശബരി വെളിച്ചെണ്ണ സൗജന്യമായി നൽകുന്നു എന്നതാണ്. ശബരി ഉത്പന്നങ്ങൾ കൂടാതെ നൂഡിൽസ്, ടൂത്ത്‌പേസ്റ്റ്, തേൻ, സോപ്പ്, പെർഫ്യൂം, നെയ്യ്, ബൂസ്റ്റ്, ഹോർലിക്‌സ്  തുടങ്ങി നിരവധി എഫ്.എം.സി.ജി സാധനങ്ങൾക്ക് വിലക്കുറവ് ലഭിക്കുന്നുണ്ട്. രാവിലെ പത്ത് മുതൽ രാത്രി ഒമ്പത് വരെ എക്‌സ്പ്രസ് മാർട്ട് പ്രവർത്തിക്കും. സ്ഥാപനത്തിന്റെ വളർച്ചയും സേവനങ്ങളും വിശദമാക്കുന്ന വീഡിയോ പ്രദർശനവും  ഉണ്ടാകും. എറണാകുളം, കണ്ണൂർ, വയനാട് ജില്ലകളിൽ എന്റെ കേരളം പ്രദർശന വിപണന മേളയോടനുബന്ധിച്ച് സപ്ലൈകോ ഒരുക്കിയ എക്‌സ്പ്രസ്മാർട്ട് ജനശ്രദ്ധയാകർഷിച്ചിരുന്നു. തിരുവനന്തപുരം, കോഴിക്കോട് ജില്ലകളിലും എന്റെ കേരളം പ്രദർശന വിപണന മേളയുടെ ഭാഗമായി എക്‌സ്പ്രസ് മാർട്ട് സജ്ജമാക്കും. കോഴിക്കോട് ബീച്ചിൽ മെയ് 12 മുതൽ 18 വരെയും, തിരുവനന്തപുരം കനകക്കുന്ന് കൊട്ടാരത്തിൽ മെയ് 20 മുതൽ 27 വരെയുമാണ് എക്സ്പ്രസ് മാർട്ട് പ്രവർത്തിക്കുക.