അഗളി(പാലക്കാട്): അപൂര്‍വയിനമായ കൂരമാനിനെ വെടിവെച്ചുകൊന്ന രണ്ടുപേരെ അട്ടപ്പാടി പുതൂര്‍ പഞ്ചായത്തിലെ ദൊഡുഗട്ടിയില്‍ വനപാലകര്‍ പിടികൂടി.ദൊഡുഗട്ടി സ്വദേശികളായ രങ്കസ്വാമി (54), മരുതൻ (55) എന്നിവരാണ് അറസ്റ്റിലായത്.
ബുധനാഴ്ച രാവിലെ ദൊഡുഗട്ടി വനത്തില്‍നിന്നാണ് നാലുവയസ്സുള്ള കൂരമാനിനെ വെടിവെച്ചു പിടിച്ചത്. ഒച്ചകേട്ട് വനംവകുപ്പ് ജീവനക്കാര്‍ പരിശോധന നടത്തിയപ്പോഴാണ് ഇരുവരും പിടിയിലായത്. മാനിന്റെ ജഡവും കണ്ടെടുത്തു. ഇവരുടെ കൈയില്‍നിന്ന് നാടൻ തോക്കും പിടികൂടിയിട്ടുണ്ട്.
മാൻവര്‍ഗത്തിലെ ചെറിയ ഇനമാണ് കൂരമാൻ. അട്ടപ്പാടി റേഞ്ചിലെ പുതൂര്‍ ഫോറസ്റ്റ് സ്റ്റേഷനിലെ ഡെപ്യൂട്ടി റേഞ്ച് ഫോറസ്റ്റ് ഓഫീസര്‍ ബി. ബിനു, സെക്ഷൻ ഫോറസ്റ്റ് ഓഫീസര്‍ എം. ശ്രീനിവാസൻ, ബീറ്റ് ഫോറസ്റ്റ് ഓഫീസര്‍മാരായ കെ. പ്രസാദ്, റോഷ്നി ചാക്കോ, കാര്‍ത്തികേയൻ, ഫോറസ്റ്റ് വാച്ചര്‍മാരായ എല്‍. മുരുകൻ, സ്വാമിനാഥൻ എന്നിവരാണ് വനപാലകസംഘത്തില്‍ ഉണ്ടായിരുന്നത്. പുതൂര്‍ വെറ്ററിനറി ഡോക്ടര്‍ പോസ്റ്റുമോര്‍ട്ടം നടത്തി.