തിരിച്ചടിക്കാൻ വിദേശ മലയാളിയുടെ ക്വട്ടേഷൻ നാലംഗ ഗുണ്ടസംഘം അറസ്റ്റില്‍
തിരുവല്ല: കൃത്യമായ തുമ്പോ തെളിവോ സാക്ഷികളോ ഇല്ലാതിരുന്ന കേസില്‍ അന്വേഷണ മികവിലൂടെ സംസ്ഥാനത്തിന്റെ വിവിധ ഭാഗങ്ങളിലെ പൊലീസ് സ്റ്റേഷനുകളില്‍ ഒട്ടനവധി ക്രിമിനല്‍ കേസുകളില്‍ പ്രതികളായ നാലംഗ ക്വൊട്ടേഷൻ സംഘത്തെ പിടികൂടി തിരുവല്ല പൊലീസ്.
മാവേലിക്കര നൂറനാട് പടനിലം അരുണ്‍ നിവാസില്‍ അനില്‍കുമാര്‍ (അക്കു – 30), കാര്‍ത്തികപ്പള്ളി ചെറുതന ഇലഞ്ഞിക്കല്‍ വീട്ടില്‍ ജി. യദു കൃഷ്ണൻ (വിഷ്ണു – 26), വിയപുരം കാരിച്ചാല്‍ കൊച്ചിക്കാട്ടില്‍ വീട്ടില്‍ കെ.ഡി. സതീഷ് കുമാര്‍ (43), അമ്പലപ്പുഴ കരുമാടി സംഗീത മന്ദിരത്തില്‍ ഷമീര്‍ ഇസ്മയില്‍ (റോയി -32) എന്നിവരാണ് പിടിയിലായത്. അനില്‍ കുമാറിന്റെ കൊടുമണ്‍ നെടുമണ്‍ കാവിന് സമീപത്തെ വീട്ടില്‍നിന്നുമാണ് സംഘത്തെ അറസ്റ്റ് ചെയ്തത്.
കവിയൂര്‍ പഴമ്പള്ളി തുണ്ട് പറമ്പില്‍ വീട്ടില്‍ മനീഷ് വര്‍ഗീസിനെ (38) ആക്രമിച്ച്‌ പരിക്കേല്‍പിച്ച കേസിലാണ് ഇവര്‍ കുടുങ്ങിയത്. കവിയൂര്‍ സ്വദേശിയായ വിദേശ മലയാളി നല്‍കിയ ക്വട്ടേഷൻ പ്രകാരം മനീഷിനെ മാരക ആയുധങ്ങളുമായി ആക്രമിക്കുകയായിരുന്നു.
ഈമാസം പന്ത്രണ്ടാം തീയതി വൈകീട്ട് നാല് മണിയോടെ കവിയൂര്‍ പഴംപള്ളി ജങ്ഷന് സമീപമായിരുന്നു കേസിന് ആസ്പദമായ സംഭവം. വഴിയരികില്‍ കാറില്‍ കാത്തുകിടന്ന സംഘം, ബൈക്കിലെത്തിയ മനീഷിന്റ മുഖത്ത് മുളകുപൊടി എറിഞ്ഞശേഷം ഇരുമ്ബ് പൈപ്പ് അടക്കം ആയുധങ്ങള്‍ ഉപയോഗിച്ച്‌ ആക്രമിക്കുകയായിരുന്നു. തലക്ക് ഗുരുതര പരിക്കേറ്റ് മനീഷ് തിരുവല്ലയിലെ സ്വകാര്യ ആശുപത്രിയില്‍ തീവ്രപരിചരണ വിഭാഗത്തിലായിരുന്നു. പ്രതികള്‍ സഞ്ചരിച്ച മാരുതി ആള്‍ട്ടോ കാറിന്റെ അവ്യക്തമായ സി.സി ടി.വി ദൃശ്യങ്ങള്‍ പൊലീസിന് ലഭിച്ചിരുന്നു. തുടര്‍ന്ന് അതിനൂതന സാങ്കേതികവിദ്യയായ ഫോറൻസിക് വിഡിയോ അനാലിസിസ് സംവിധാനം ഉപയോഗിച്ചാണ് പ്രതികള്‍ സഞ്ചരിച്ചിരുന്ന വാഹനം തിരിച്ചറിഞ്ഞത്. കാറും പൊലീസ് പിടിച്ചെടുത്തിട്ടുണ്ട്.
പിടിയിലായ ഗുണ്ട സംഘത്തിന്റെ ആക്രമണത്തില്‍ പരിക്കേറ്റ മനേഷ് വര്‍ഗീസ് അടങ്ങുന്ന നാലംഗസംഘം രണ്ടുവര്‍ഷം മുമ്പ് കവിയൂരില്‍ കേസില്‍ ക്വട്ടേഷൻ നല്‍കിയ കവിയൂര്‍ സ്വദേശിയായ വിദേശ മലയാളിയെ ആക്രമിച്ചിരുന്നു. ഇതിന്റെ വൈരാഗ്യം തീര്‍ക്കുന്നതിനായി മനീഷിനെ ആക്രമിക്കുവാൻ തിരുവല്ല സ്വദേശിയായ ഗുണ്ട നേതാവിന് വിദേശ മലയാളി 1,40,000 രൂപയുടെ ക്വൊട്ടേഷൻ നല്‍കി. ക്വട്ടേഷൻ നല്‍കിയ വിദേശ മലയാളിയടക്കം പിടിയിലാവാൻ ഉണ്ടെന്നും പിടിയിലായ പ്രതികള്‍ വധശ്രമം അടക്കം ഒട്ടനവധി കേസുകളില്‍ പ്രതികളാണെന്നും പൊലീസ് പറഞ്ഞു.
തിരുവല്ല സി.ഐ സുനില്‍ കൃഷ്ണന്റെ നേതൃത്വത്തില്‍ സീനിയര്‍ സി.പി.ഒമാരായ അഖിലേഷ്, ഉദയ ശങ്കര്‍, മനോജ്, സി.പി.ഒ അവിനാശ് എന്നിവരടങ്ങുന്ന സംഘമാണ് പ്രതികളെ പിടികൂടിയത്.