ബി​ഗ്ബിയുടെ ‘തലവര’ മാറ്റിയ സഹോദരൻ; 20 മില്യൺ ഡോളർ ആസ്തിയുള്ള ബിസിനസുകാരൻ

ബോളിവുഡ് ഇതിഹാസ താരമായ അമിതാഭ് ബച്ചന്റെ ഇളയ സഹോദരനാണ് അജിതാഭ് ബച്ചൻ . അടുത്തിടെ ‘The Archies’ എന്ന ചലച്ചിത്രത്തിൽ ആദ്യമായി അഭിനയിച്ചിരുന്നു. പൊതുവേദികളിൽ അധികം പ്രത്യക്ഷപ്പെടാത്ത, പ്രശസ്തിയുടെ വെള്ളിവെളിച്ചത്തിൽ നിന്ന് അകന്നു നിൽക്കുന്ന അജിതാഭ് ബച്ചൻ, ഇതോടെ മാധ്യമങ്ങളിലടക്കം ചർച്ചാ വിഷയമാവുകയായിരുന്നു. അമിതാഭ് ബച്ചൻ സിനിമയുടെ ലോകം തെരഞ്ഞെടുത്തപ്പോൾ അജിതാഭ് ബച്ചൻ ബിസിനസിന്റെ കടലിൽ സഞ്ചരിക്കാനാണ് ഇഷ്ടപ്പെട്ടത്. സിഎൻബിസി ടിവി 18, ഡിഎൻഎ ഇന്ത്യ എന്നിവയുടെ റിപ്പോർട്ടുകൾ പ്രകാരം അദ്ദേഹത്തിന്റെ ആസ്തിമൂല്യം 20 മില്യൺ ഡോളർ അഥവാ ഏകദേശം 166.68 കോടി രൂപയാണ്.

അമിതാഭ് ബച്ചനേക്കാൾ അഞ്ചു വർഷം പ്രായക്കുറവാണ് അജിതാഭിനുള്ളത്. അമിതാഭിനെപ്പോലെ തന്നെ അദ്ദേഹത്തിന്റെ സഹോദരനും ഉത്തരാഖണ്ഡ് നൈനിറ്റാളിലെ ഷേർവുഡ് കോളേജിലാണ് പഠിച്ചത്. പഠനം പൂർത്തിയായതിനു ശേഷം അജിതാഭ് ബച്ചൻ ഏതാനും വർഷങ്ങൾ ഇന്ത്യയിൽ പ്രവർത്തിച്ചു. പിന്നീട്, ലണ്ടനിൽ അദ്ദേഹം വിജയകരമായി മാറിയ ഒരു സംരംഭം ആരംഭിച്ചു. റിപ്പോർട്ടുകൾ പ്രകാരം Qa Hydrocarbons, Asn Hydrocarbons, Asn Innovative എന്നീ മൂന്ന് കമ്പനികളിൽ അദ്ദേഹം ഡയറക്ടർ സ്ഥാനം വഹിക്കുന്നു.

അലഹാബാദിൽ 1947ൽ ആണ് അജിതാഭ് ബച്ചന്റെ ജനനം. റമോല ബച്ചനെയാണ് അജിതാഭ് വിവാഹം ചെയ്തിരിക്കുന്നത്. നിലവിൽ അദ്ദേഹം കുടുംബ സമേതം ലണ്ടനിലാണ് താമസമാക്കിയിരിക്കുന്നത്. കോൻ ബനേഗ ക്രോർപതിയ സീസൺ 5 ൽ, താൻ ചലച്ചിത്രലോകത്തേക്ക് കടന്നു വരാൻ കാരണം സഹോദരനാണെന്ന് അമിതാഭ് ബച്ചൻ വെളിപ്പെടുത്തിയിരുന്നു. ഒരു മത്സരത്തിൽ പങ്കെടുക്കുന്നതിന് വേണ്ടി അമിതാഭിന്റെ ചിത്രങ്ങൾ സഹോദരൻ എടുത്തു നൽകുമ്പോഴാണ് വഴിത്തിരിവുണ്ടാകുന്നത്. അമിതാഭ് ബച്ചൻ നിർബന്ധമായും ചലച്ചിത്ര മേഖലയിലാണ് പ്രവർത്തിക്കേണ്ടതെന്ന് സഹോദരൻ പറയുകയുണ്ടായി. ആ മത്സരത്തിൽ നിന്ന് നിരസിക്കപ്പെട്ടെങ്കിലും അജിതാഭിന്റെ വാക്കുകൾ തന്റെ മനസ്സിൽ പതിഞ്ഞതായി ബിഗ് ബി ഓർമിക്കുന്നു.

ആ വാക്കുകൾ പിന്നീട് ഇന്ത്യൻ സിനിമാ വ്യവസായത്തിന് ലാഭക്കണക്കുകളും, താരമൂല്യമുള്ള ഒരു ഇതിഹാസ താരത്തെയും സമ്മാനിച്ചുവെന്നതാണ് യാഥാർത്ഥ്യം. കൊൽക്കത്തയിലെ ജോലി ഉപേക്ഷിച്ച് അമിതാഭ് ബച്ചൻ ഇന്ത്യൻ ചലച്ചിത്ര മേഖലയിലേക്ക് കാലെടുത്തു വെക്കുകയായിരുന്നു. തന്റെ സഹോദരനെ കാണാൻ ഇടയ്ക്കിടെ ലണ്ടനിൽ നിന്ന് പറന്നെത്തുന്ന അജിതാഭ് ബച്ചൻ‌ പക്ഷെ അതൊക്കെ സ്വകാര്യമായി ചെയ്യാനാണ് ഇഷ്ടപ്പെടുന്നത്.