‘ക്ലീന്‍ യു’; സെന്‍സറിംഗ് പൂര്‍ത്തിയാക്കി മീര ജാസ്മിന്റെ ‘ക്വീന്‍ എലിസബത്ത്’
മീര ജാസ്മിന്‍, നരേന്‍ എന്നിവരെ കേന്ദ്ര കഥാപാത്രങ്ങളാക്കി എം പത്മകുമാര്‍ സംവിധാനം ചെയ്യുന്ന ക്വീന്‍ എലിസബത്ത് എന്ന ചിത്രത്തിന്റെ സെന്‍സറിംഗ് പൂര്‍ത്തിയായി.
ക്ലീന്‍ യു സര്‍ട്ടിഫിക്കറ്റ് ആണ് ചിത്രത്തിന്. ഡിസംബര്‍ 29 ന് തിയറ്ററുകളിലെത്താനിരിക്കുന്ന ചിത്രം ഒരിടവേളയ്ക്ക് ശേഷമുള്ള മീര ജാസ്മിന്റെ മടങ്ങിവരവ് കൂടിയാണ്. കുടുംബ പ്രേക്ഷകരെ ആകര്‍ഷിക്കുന്ന വിധത്തില്‍ റൊമാന്‍റിക് കോമഡി എന്റര്‍ടെയ്‍നറായി എത്തുന്ന ചിത്രമാണിത്. ചിത്രത്തിന്റെ ട്രെയിലര്‍ പ്രേക്ഷകശ്രദ്ധ നേടിയിരുന്നു.
വെള്ളം, അപ്പൻ, പടച്ചോനെ ഇങ്ങള് കാത്തോളീ എന്നീ ചിത്രങ്ങളുടെ നിര്‍മ്മാതാവായ രഞ്ജിത്ത് മണമ്ബ്രക്കാട്ടും എം പത്മകുമാര്‍, ശ്രീറാം മണമ്ബ്രക്കാട്ട് എന്നിവരും ചേര്‍ന്ന് ബ്ലൂ മൗണ്ട് പ്രൊഡക്ഷൻസിന്‍റെ ബാനറിലാണ് ചിത്രം നിര്‍മ്മിച്ചിരിക്കുന്നത്. ശ്വേത മേനോൻ, രമേശ് പിഷാരടി, വി കെ പ്രകാശ്, രണ്‍ജി പണിക്കര്‍, ജോണി ആന്റണി, മല്ലിക സുകുമാരൻ, ജൂഡ് ആന്റണി ജോസഫ്, ആര്യ (ബഡായി ബംഗ്ലാവ്), ശ്രുതി രജനികാന്ത്, പേളി മാണി, സാനിയ ബാബു, നീന കുറുപ്പ്, മഞ്ജു പത്രോസ്, വിനീത് വിശ്വം, രഞ്ജി കാങ്കോല്‍, ചിത്ര നായര്‍ എന്നിവരാണ് മറ്റ് പ്രധാന വേഷങ്ങളിലെത്തുന്നത്.
അച്ചുവിന്റെ അമ്മ, മിന്നാമിന്നിക്കൂട്ടം, ഒരേ കടല്‍ തുടങ്ങിയ ചിത്രങ്ങള്‍ക്ക് ശേഷം നരേനും മീരാ ജാസ്മിനും ഒരുമിക്കുന്ന ക്യൂൻ എലിസബത്തിലൂടെ മീര ജാസ്മിന്‍ തന്റെ ഉജ്ജ്വലമായ അഭിനയ ജീവിതത്തിലേക്കുള്ള തിരിച്ചുവരവ് നടത്തുമെന്നാണ് അണിയറക്കാരുടെ പ്രതീക്ഷ. അര്‍ജുൻ ടി സത്യന്‍ ആണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഛായാഗ്രഹണം ജിത്തു ദാമോദര്‍, സംഗീത സംവിധാനം, പശ്ചാത്തല സംഗീതം രഞ്ജിൻ രാജ്, ഗാനരചന ഷിബു ചക്രവര്‍ത്തി, അൻവര്‍ അലി, സന്തോഷ് വര്‍മ്മ, ജോ പോള്‍, എഡിറ്റിംഗ് അഖിലേഷ് മോഹൻ, കലാസംവിധാനം എം ബാവ, ചീഫ് അസോസിയേറ്റ് ഡയറക്ടര്‍ ഉല്ലാസ് കൃഷ്ണ, വസ്ത്രാലങ്കാരം ആയീഷ ഷഫീര്‍ സേഠ്, മേക്കപ്പ് ജിത്തു പയ്യന്നൂര്‍, പ്രൊഡക്ഷൻ കണ്‍ട്രോളര്‍ ശിഹാബ് വെണ്ണല, സ്റ്റില്‍സ് ഷാജി കുറ്റികണ്ടത്തില്‍, പ്രൊമോ സ്റ്റില്‍സ് ഷിജിൻ പി രാജ്, പോസ്റ്റര്‍ ഡിസൈൻ മനു, ഡിജിറ്റല്‍ മാര്‍ക്കറ്റിങ്ങ് വിഷ്ണു സുഗതൻ, പിആര്‍ഒ ശബരി. ഡിജിറ്റല്‍ മാര്‍ക്കറ്റിംഗ് ഒബ്സ്ക്യൂറ എന്റര്‍ടൈൻമെന്റ്.