‘അത് ഷുക്കൂറിന്റെ മാത്രം കഥയല്ല’, ഇത് നടന്നതാണോയെന്ന അസംബന്ധം വേണ്ടെന്നും ബെന്യാമിൻ
ബെന്യാമിന്റെ ആടുജീവിതം നോവല്‍ സിനിമയായി എത്തിയിരിക്കുകയാണ്. പൃഥ്വിരാജിനെ നായകനാക്കി ബ്ലസ്സി ആടുജീവിതം സംവിധാനം ചെയ്‍തപ്പോള്‍ ലോകമെമ്ബാടുമുള്ള പ്രേക്ഷകര്‍ ആ സിനിമയെ ഏറ്റെടുത്ത് വിജയിപ്പിച്ചിരിക്കുകയാണ് എന്നാണ് റിപ്പോര്‍ട്ട്.
ആടുജിവിതം മലയാളിയായ ഷുക്കൂറിന്റെ ജീവിത കഥയില്‍ നിന്ന് പ്രചോദനം കൊണ്ട നോവലാണ്. അനേകം ഷുക്കൂറുമാരില്‍ നിന്നും കടംകൊണ്ട കഥാപാത്രമാണ് നജീബ് എന്നും നോവലിലെ പ്രവര്‍ത്തികള്‍ക്ക് താനാണ് ഉത്തരവാദിയെന്നും ബെന്യാമിൻ കുറിപ്പിലൂടെ വ്യക്തമാക്കിയിരിക്കുകയാണ്.
സാമൂഹ്യ മാധ്യമത്തില്‍ എഴുതിയ കുറിപ്പിലാണ് തന്റെ അഭിപ്രായം വീണ്ടും ബെന്യാമിൻ വ്യക്തമാക്കിയിരിക്കുന്നത്. ഞാൻ കഴിഞ്ഞ ഇരുപത് വർഷങ്ങളായി പറയുന്ന കാര്യങ്ങളാണ്. സിനിമ ഇറങ്ങിയ പശ്ചാത്തലത്തില്‍ ഒരിക്കല്‍കൂടി പറയുകയാണ് ഞാൻ. എന്റെ നായകൻ നജീബ് ആണ്. ഷുക്കൂർ അല്ല. അനേകം ഷുക്കൂറുമാരില്‍ നിന്നും കടംകൊണ്ട കഥാപാത്രമാണ് നജീബ്. അതില്‍ പലരുടെ, പലവിധ അനുഭവങ്ങള്‍ താൻ കൂട്ടിച്ചേർത്തിട്ടുണ്ട് എന്നും ബെന്യാമിൻ വ്യക്തമാക്കുന്നു.
മുപ്പത് ശതമാനം താഴെ മാത്രമേ തന്റെ നോവലില്‍ ഷുക്കൂറുള്ളുവെന്നും ബെന്യാമിൻ വ്യക്തമാക്കുന്നു. ആടുജീവിതം ഷുക്കൂറിന്റെ ജീവിത കഥയല്ല. അത് എന്റെ നോവലാണ്. നോവല്‍. നോവല്‍. അത് അതിന്റെ പുറം പേജില്‍ വലിയ അക്ഷരത്തില്‍ എഴുതി വച്ചിട്ടുണ്ട്. അത് ജീവിതകഥ ആണെന്ന് ആരെങ്കിലും ധരിക്കുന്നെങ്കില്‍ അത് എന്റെ കുഴപ്പമല്ല.
അതിലെ നജീബ് എന്ന ആ കഥാപാത്രം ചെയ്യുന്ന പ്രവൃത്തികള്‍ക്ക് ഞാനാണ് ഉത്തരവാദി. എനിക്ക് അതിനു വിശദീകരണങ്ങള്‍ ഉണ്ട്. വേദികളില്‍ ഞാനത് ഒരുപാട് പറഞ്ഞിട്ടുണ്ട്. ഷുക്കൂറിനെ അദ്ദേഹത്തിന്റെ പാട്ടിനു വിടുക. ഇതൊക്കെ നടന്നതാണോയെന്ന അസംബന്ധം ഒഴിവാക്കുക. നോവലിനെ സംബന്ധിച്ച സംശയങ്ങള്‍ തന്നോട് ചോദിക്കൂ എന്നും ബെന്യാമൻ ആവശ്യപ്പെടുകയാണ് വീണ്ടും.