പ്രവാസം അവസാനിപ്പിച്ച്‌ നാട്ടിലേക്ക് മടങ്ങാനിരിക്കെ ഇന്ത്യക്കാരൻ ഹൃദയാഘാതം മൂലം മരിച്ചു
റിയാദ്: പ്രവാസം അവസാനിപ്പിച്ച്‌ നാട്ടിലേക്ക് മടങ്ങാനിരിക്കെ ഇന്ത്യാക്കാരനായ യുവാവ് മരിച്ചു. യു.പി സ്വദേശി അവാദ്‌ നാരായണ്‍ ചൗഹാൻ (43) ആണ് ഹൃദയാഘാതം മൂലം മരിച്ചത്.22 വർഷമായി തെക്കൻ സൗദിയിലെ നജ്‌റാനില്‍ അല്‍ മസാർ കണ്‍സ്ട്രഷൻ കമ്ബനിയില്‍ ഇലക്‌ട്രീഷ്യനായി ജോലി ചെയ്യുകയായിരുന്നു. പ്രവാസം അവസാനിപ്പിച്ച്‌ നാട്ടിലേക്ക് മടങ്ങാൻ എക്സിറ്റ്‌ വിസ അടിച്ച്‌ കാത്തിരിക്കുന്നതിനിടയിലാണ്‌ അന്ത്യം സംഭവിച്ചത്‌.
ഭാര്യയും ഒരു മകനുമാണുള്ളത്. ഇന്ത്യൻ കോണ്‍സുലേറ്റ്‌ സി.സി.ഡബ്ല്യു മെമ്ബറും നജ്റാൻ ഒ.ഐ.സി.സി പ്രസിഡൻറുമായ എം.കെ. ഷാക്കിർ കൊടശേരിയുടെ ശ്രമഫലമായി വളരെ വേഗം നിയമനടപടികള്‍ പൂർത്തീകരിച്ച്‌ മൃതദേഹം സൗദി എയർലൈൻസ് വിമാനത്തില്‍ നാട്ടിലേക്കയച്ചു. ഒ.ഐ.സി.സി നേതാക്കളായ ടി.എല്‍. അരുണ്‍ കുമാർ, വെല്‍ഫെയർ വിങ് കണ്‍വീനർ രാജു കണ്ണൂർ, മീഡിയ കണ്‍വീനർ ഫൈസല്‍ പൂക്കോട്ടുപാടം, വിനോദ് കണ്ണൂർ എന്നിവരും സഹായത്തിന് രംഗത്തുണ്ടായിരുന്നു.