ഫറൂഖ് കോളേജിലെ അതിരുവിട്ട ഓണാഘോഷം; പൊലീസിനും എംവിഡിക്കും പിന്നാലെ ഹൈക്കോടതിയും, സ്വമേധയാ കേസെടുത്തു
കൊച്ചി: കോഴിക്കോട് ഫറൂഖ് കോളേജില് ഓണാഘോഷത്തിനിടെ അപകടകരമായ രീതിയില് വാഹനങ്ങളോടിച്ച സംഭവത്തില് സ്വമേധയാ കേസെടുത്ത് ഹൈക്കോടതി.വാർത്ത കണ്ടതിനെ തുടർന്നാണ് കോടതി സ്വമേധയാ കേസെടുത്തത്. പൊലീസും മോട്ടോർ വാഹന വകുപ്പും 8 വണ്ടികള് കസ്റ്റഡിയിലെടുത്തിട്ടുണ്ട്. വാഹനം ഓടിച്ചവരുടെ ലൈസൻസ് റദ്ദാക്കും. വാഹന ഉടമകള്ക്കെതിരെ ഇന്നലെ കേസ് എടുത്തിരുന്നു.
ഓണാഘോഷത്തിനിടെ വാഹനങ്ങള്ക്ക് മുകളിലും ഡോറിലും ഇരുന്നാണ് വിദ്യാര്ത്ഥികള് അപകട യാത്ര നടത്തിയത്. സംഭവത്തില് പൊലീസും മോട്ടോര് വാഹന വകുപ്പും കേസെടുത്തിട്ടുണ്ട്. ദൃശ്യങ്ങള് പുറത്ത് വന്നതോടെയാണ് മോട്ടോര് വാഹന വകുപ്പ് നടപടി തുടങ്ങിയത്. അപകടകരമായ രീതിയില് വാഹനങ്ങളോടിച്ചതിന് വാഹനഉടമകളുടെ പേരില് മോട്ടോര്വാഹനവകുപ്പ് കേസെടുത്തു. ഫറോക് പൊലീസും സംഭവത്തില് കേസെടുത്തിട്ടുണ്ട്.
കറുത്ത വസ്ത്രങ്ങളുമായി ബഹളത്തോടെ ഓഡി അടക്കമുള്ള ആഡംബര വാഹനങ്ങളിലായിരുന്നു നാട്ടുകാരെ ബുദ്ധിമുട്ടിച്ചുള്ള വിദ്യാർത്ഥികളുടെ റോഡ് ഷോ. നാട്ടുകാരില് ചിലരാണ് ഇതിന്റെ ദൃശ്യങ്ങള് ഫോണില് ചിത്രീകരിച്ചത്. കാറുകള് തിരിച്ചറിഞ്ഞതായും ഉടൻ തന്നെ തുടർനടപടികളുണ്ടാവുമെന്നുമാണ് പൊലീസ് വിശദമാക്കിയിട്ടുള്ളത്.
