പാര്സല് സര്വീസ് വാഹനവും കാറും കൂട്ടിയിടിച്ച് അപകടം; നാലു പേര്ക്ക് ഗുരുതര പരിക്ക്
പത്തനംതിട്ട:പത്തനംതിട്ടയില് പാര്സല് സര്വീസ് വാഹനവും കാറും കൂട്ടിയിടിച്ചുണ്ടായ അപകടത്തില് നാലു പേര്ക്ക് പരിക്കേറ്റു.ഇന്ന് വൈകിട്ട് മൂന്നരയോടെ പുനലൂര്-മൂവാറ്റുപ്പുഴ സംസ്ഥാന പാതയില് മണ്ണാറക്കുളഞ്ഞിയിലാണ് വാഹനാപകടമുണ്ടായത്. അപകടത്തെ തുടര്ന്ന് പുനലൂര്-മൂവാറ്റുപ്പുഴ സംസ്ഥാന പാതയില് ഗതാഗതം സ്തംഭിച്ചു.
പരിക്കേറ്റവരെ പത്തനംതിട്ട ജനറല് ആശുപത്രിയിലേക്ക് മാറ്റി. ഗുരുതരമായി പരിക്കേറ്റവരെ മെഡിക്കല് കോളേജിലേക്ക് മാറ്റിയേക്കും. റോഡില് വാഹനതിരക്കേറിയ സമയത്തായിരുന്നു അപകടം. റോഡില് വാഹനങ്ങളില് നിന്ന് ഓയില് അടക്കം പരന്നു. ഫയര്ഫോഴ്സെത്തി റോഡ് വൃത്തിയാക്കിയശേഷമാണ് ഗതാഗതം പുനസ്ഥാപിച്ചത്.
ഇതിനിടെ, ഉയരപ്പാത നിർമ്മാണം നടക്കുന്ന ആലപ്പുഴ അരൂർ ചന്തിരൂരില് ഉണ്ടായ വാഹനപകടത്തില് പരിക്കേറ്റ യുവാവ് മരിച്ചു. തലവടി സ്വദേശി 24 കാരനായ പ്രവീണ് ആണ് മരിച്ചത്. ഇന്ന് പുലർച്ചെയായിരുന്നു അപകടം. ബാരിക്കേഡില്തട്ടി നിയന്ത്രണം വിട്ട സ്കൂട്ടറില് നിന്ന് റോഡില് വീണ പ്രവീണിനെ പിറകെ വന്ന ലോറി ഇടിക്കുകയായിരുന്നു. ഉടനെ എറണാകുളത്തെ ആശുപത്രിയില് എത്തിച്ചെങ്കിലും ജീവൻ രക്ഷിക്കാനായില്ല. ഒപ്പം ഉണ്ടായിരുന്ന സുഹൃത്ത് ചികിത്സയില് തുടരുകയാണ്.
