വെള്ളത്തിനടിയില്‍ ജീവിച്ചതിന്റെ റെക്കോര്‍ഡുമായി 59കാരൻ, കുഞ്ഞൻ ക്യാപ്സൂളില്‍ കഴിഞ്ഞത് 120 ദിവസം
പനാമ: കടലിനടിയിലെ 30 സ്ക്വയർ മീറ്റർ മാത്രം വലുപ്പമുള്ള ക്യാപ്സൂളില്‍ 59കാരൻ കഴിഞ്ഞത് 120 ദിവസം. പനാമ തീരത്തിന് സമീപത്തായി കടലിനടിയില്‍ വെള്ളത്തില്‍ കഴിഞ്ഞ് റെക്കോർഡുമായാണ് ജർമനിയിലെ ബഹിരാകാശ എൻജിനിയറായ റുഡിഗർ കോച്ച്‌ കരയിലേക്ക് എത്തുന്നത്.ഏറ്റവുമധികം ദിവസം വെള്ളത്തിനടിയില്‍ ജീവിച്ചുവെന്ന റെക്കോർഡാണ് ഈ 59കാരന്റെ നേട്ടം. വെള്ളിയാഴ്ചയാണ് വെള്ളത്തിനടിയിലെ വാസം അവസാനിപ്പിച്ച്‌ റുഡിഗർ കോച്ച്‌ കരയിലെത്തിയത്.
അമേരിക്കക്കാരനായ ജോസഫ് ഡിറ്റൂറി 100 ദിവസം വെള്ളത്തിനടിയില്‍ കഴിഞ്ഞ റെക്കോർഡാണ് റൂഡിഗർ കോച്ച്‌ തകർത്തത്. കടല്‍ നിരപ്പില്‍ നിന്ന് 11 മീറ്റർ താഴ്ചയിലായിരുന്നു റുഡിഗർ കോച്ച്‌ കഴിഞ്ഞ 120 ദിവസം കഴിഞ്ഞത്. കിടക്ക, ശുചിമുറി, ടിവി, കംപ്യൂട്ടർ, ഇന്റർനെ്റ്, എക്സൈസ് ബൈക്ക് എന്നിവ അടക്കമുള്ള സൌകര്യങ്ങളായിരുന്നു 30 സ്ക്വയർ മീറ്റർ മാത്രം വലുപ്പമുള്ള ക്യാപ്സൂളില്‍ റൂഡിഗറിന് ലഭ്യമായിരുന്നത്. മദർ വെസലുമായി ബന്ധിപ്പിച്ച ക്യാപ്സൂളില്‍ സൌരോർജ്ജത്തില്‍ നിന്നാണ് വൈദ്യുതി ലഭ്യമാക്കിയിരുന്നത്.
എവിടെ സ്ഥിരമായി താമസിക്കാം എന്നതിന് മറ്റ് പല വീക്ഷണ കോണുകള്‍ നല്‍കുന്നതായിരുന്നു അനുഭവമെന്നാണ് റൂഡിഗർ വിശദമാക്കുന്നത്. എന്നാല്‍ കുളിക്കാനുള്ള സൌകര്യം ശുചിമുറിയില്‍ ഇല്ലാതിരുന്നതാണ് ആകെ നേരിട്ട ബുദ്ധിമുട്ടെന്നാണ് റൂഡിഗർ വിശദമാക്കുന്നത്. ക്യാപ്സൂളിനുള്ളിലെ റൂഡിഗറിന്റെ ജീവിതം നാല് ക്യാമറകളാണ് നിരന്തരം നിരീക്ഷിച്ചിരുന്നത്. മാനസികാരോഗ്യം ഉള്‍പ്പെടെയുള്ളത് ഉറപ്പുവരുത്താനായിരുന്നു ഇത്.
ഗിന്നസ് വേള്‍ഡ് റെക്കോര്‍ഡ്‌സ് വിധികര്‍ത്താവായ സൂസന്ന റെയ്സിന്റെ സാന്നിധ്യത്തിലാണ് റൂഡിഗര്‍ കോച്ച്‌ കടലിനടിയിലെ ക്യാപ്‌സ്യൂളില്‍ നിന്ന് പുറത്തുവന്നത്. കടല്‍ ശാന്തമായിരിക്കുമ്ബോള്‍ വലിയ പ്രശ്നങ്ങളൊന്നുമുണ്ടാകില്ല. അല്ലാത്തപ്പോള്‍ കാര്യങ്ങള്‍ വിചാരിക്കുന്ന അത്ര എളുപ്പമല്ലെന്നാണ് റൂഡിഗറിന്റെ പ്രതികരണം. കഴിഞ്ഞ സെപ്റ്റംബർ 26 മുതലാണ് റുഡിഗർ കടലിനടിയില്‍ ജീവിതം തുടങ്ങിയത്. ജനുവരി 24ന് ദൗത്യം പൂർത്തിയാക്കി. ഡോക്ടര്‍ക്കും മക്കള്‍ക്കും ഭാര്യക്കും മാത്രമാണ് കോച്ചിനെ സന്ദര്‍ശിക്കാന്‍ അനുമതിയുണ്ടായിരുന്നത്. കനേഡിയന്‍ വ്യവസായിയായ ഗ്രാന്‍ഡ് റോമണ്ട് ആണ് ദൗത്യത്തിന് ആവശ്യമായ പിന്തുണ നല്‍കിയത്.